كيف تكون عميقاً في خطوات ؟ "قواعد العُمق الخمسة عشر"

علشان تكون عميق بزيادة اتبع الخطوات الآتية :

١- اسمع فيروز الصبح و افضل دور معاها على شادي لحد ما تلاقيه.

٢- تفضل تشرب في قهوة حتى لو مش بتحبها و يا سلام لو تصور الفنجان هتبقى محصلتش، ولو مفيش فنجان ادخل على جوجل نقي اللي يعجبك محدش هياخد باله.

٣- تعمل ريبوست لجميع أغاني الأندرجراوند وتركز على غالية بن على و دينا الوديدي و دنيا مسعود علشان بياكلوا اوي مع الناس العميقة اللي زيَك.

٤- تشتري كل الكتب اللي مسمعة في السوق وتتصور جنبها حتى لو مش هتقراها وتنزل بالصورة على انستجرام وتكتب  breathing books، و هتلاقي كل البنات ملمومة حواليك في مينيت.

٥- تشتري كل الكتب اللي مسمعة في السوق وتتصوري جنبها حتى لو مش هتقريها وتنزلي بالصورة على انستجرام وتكتبي Breathing books وهتلاقي كل الولاد ملمومة حواليكي في مينيت بس مش عشان الكتب طبعاً، عشان انتي "تاء مربوطة" مش أكتر. وفي الحالة دي متعمليش accept الا لو واحد فيه من آسر ياسين ساعتها إئسري أمه ميهمكيش.

٦- لايك لكل الصفحات اللي بتطالب بالحرية والعدل والمساواة بين الرجل والمرأة عشان التأثير يبقى عالي.

٧- الكثير من المصطلحات المعقدة الغير مفهومة، الكثير من لمّة الناس حواليك.

٨- شوف اي حاجة مفرحة الناس و اطلع نكد عليهم.

٩- اشرب قهوة تاني حتى لو لسه مش بتحبها و صور الفنجان اللي اضطريت تشتريه من ساعة ما رانيا قفشت ان الفنجان اللي فات متقلب من على جوجل لإنها كانت مقلباه قبلك.

١٠- خلي رأيك دايماً عكس كل الناس حتى لو ملهمش رأي اساساً.

١١- شير كتير لبوستات محمود درويش و عمر طاهر و أحمد خالد توفيق.

١٢- اقرا "هيبتا" وعلم على اهم الجمل بالماركر و نزلها اول بأول و اوعى تنسى الهاش تاج، خليه يلف على كل العميقين اللي زيك على قد ما تقدر لحد ما القدر و الهاش تاج يجمعكوا ببعض.

١٤- صوّر مناظر طبيعية كتير واكتب how amazing I wish I could be there
الانجليزي بيجيب مع الناس اوي.

١٥- واخيراً صاحب ناس على نفس مستوى العمق.

التعليقات