لكل السناجل فى رأس السنة.. 5 نصائح عشان الليلة تعدى

 

كل سنة وانتوا طيبين.. راس السنة قربت وداخلة علينا بكل رومانسية هنودع سنة ونستقبل سنة .. على قد ما الناس بتستنى دخول السنة الجديدة على قد ما اللحظة دي بتكون في منتهى القسوة على السناجل، وعلشان كده قررت "الحكاية" إعطاء بعض النصائح لكل سينجل حزين مكتئب من غير حبيب يحتفل معاه براس السنة الجديدة.
1- تجنب الاستماع إلى الأغاني الحزينة. فكرة تامر عاشور ووائل جسار ومحمد محي تتمحي من ذاكرتك بأي شكل ويحل محلها مهرجان فرتكة فرتكة واعمله ريبيت كتير هتتبسط وترقص في مكانك.
2- لو زنقت معاك قوي وهتروح تسهر في مكان مع شلتك في مكان ما.. غض البصر على قد ما تقدر وبص في السقف لإن هوه الوحيد اللي هيشاركك اللحظة دي من غير ما يجرح مشاعرك الفياضة.
3- لما تكون سينجل هتوفر فلوس كتير جداً في خروجة راس السنة والمينيمم اللي هتوفره ممكن تجيب بيه سكوتر يسعفك وقت الشدة.
4- هتحس بنشوة الاختلاف انك بتعمل حاجة غير اللى بيعملها عامة الشعب في ليلة زي دي، خليك مختلف واقعد في بيتك اعمل لك كباية شاي باللبن سقي فيها بقسماط واسمع كتاب حياتي يا عين أحسن لك ألف مرة من واحدة تنكد عليك علشان شافتك بتبص على واحدة بترقص.
5- لما تبقى سينجل ربنا هيكفيك شر الخناقات فى الشوارع لو حد طالع سكران من مكان وعاكس حبيبتك اللى معاك وخلافه، وطبعا كلنا عارفين ان انت مع أول قلم هاتسيبهالهم وتجرى وشكلك هيبقى وحش قدامها، فـ ليه شكلك قدام نفسك يبقى وحش لما ممكن يكون حلو؟
التعليقات