وصول مصر لكأس العالم بقى اسهل من الزواج.. لأ ده مش ايفيه, دي حقيقة!
كل ما الدنيا بتتطور كل ما الجواز بيتعقد, المطالب أصبحت خيالية فوق احتمال طاقة البشر. نسبة العنوسة في ازدياد مستمر.
الأهالي بتبقى شايفة بناتها بتعنس قدام عينيها ولا تراجع ولا استسلام, من أول الشقة للشبكة والمهر لفستان الفرح للفرح نفسه.

لحياة أفضل .. "الحكاية" بتنصح اي حد مقبل ع الزواج بالأتي:

- لا للـ "نيش":
النيش اللي بنعيش ونموت ومحدش بيلمسه مبقاش ليه أي تلاتين لزمة.. ليه نجيب نيش لما ممكن نستفيد بثمنه في لحافين زيادة ؟

- لا للـ "صيني":
ليه تجيبي طقم صيني بالشىء الفلاني ولازم يكون احسن من طقم نهى علشان الناس متاكلش وشنا.. لما ممكن نجيب أطباق بلاستيك ناكل فيها وتترمي؟ اهو على الأقل نوفر غسيل المواعين وقشف الايد.

- لا للـ " فرح":
ليه نعمل فرح يتكلف اكتر من المرتب اللي بتاخده طول حياتك علشان الناس تيجي تاكل وتتريق على فستان العروسة والمعازيم يفضلوا يلسنوا على بعض لما ممكن توفر ثمنه وتسافر برشلونة ومدريد وأسبانيا وفرنسا وترجع بباقي الفلوس تحطها في البنك عشان هتنفعك وقت زنقة؟ خروجة حلوة  (Outing) في مركب ع النيل هتقضي الغرض والكل هيتفسح وينبسط

- لا لـ "فستان الفرح":
ليه تشتري فستان للفرح أو تأجريه بشىء وشويات لما ممكن تلبسي أي فستان من اللي حضرتِ بيهم أفراح قبل كده, هو فيه حد بياخد باله من حاجة غيرك؟ وحتى لو حبيت تفرحى بليلة العمر أجريه أحسن ما تشترى فستان مش هيتلبس غير مرة واحدة.

- لا للـ "سفرة" :
لو جينا بصينا للسفرة هنلاقيها بتاخد حيز جامد من مساحة الشقة ده غير ان والمصحف ما هتقعدوا تاكلوا عليها ومفيش حد بيعزم حد دلوقتي ولو قررتوا تعزموا حد هتعزموه برة فـ بلاش فشخرة ع الفاضي وهاتى لك طرابيزة متحركة مدورة من "أيكيا" بأربع كراسي وشكرا على كده.