كيف تصطادين عريساً في ٢٠٢٠ بـ 9 طرق؟

عزيزتى الفتاة، يا مَن جلستِ فى بيت أهلك تنتظرين العريس المنتظر، وتبحثين كما كانت تبحث زينات صدقى عن "إنسان الغاب طويل الناب ابن حميدو".. إليك بعض من النصائح المجربةـ عليك أن تنفذيها بحذافيرها، وبعون الله العريس جاى جاى:

1- لو معاكي في الشغل ما تلبسيش كعب عالي وتتزوقي كأنك رايحة فرح ”بيحبوا البساطة والكوتشي جداً"

2- اعملي نفسك تعبانة ولو اهتم اقفشي فيه بإيدك وسنانك

3- كل ما تحسي انك هتضحكي بصوت عالي اكتمي الضحكة ”بيحبوا الرقّة وكده"

4- لو بتاخدي فطار معاكي وسمعتيه بيقول انه جعان، اديله ساندوتش ”أقرب طريق لقلب الرجل معدته

5- لو صادفت وأكلتي قدامه، كلي بالراحة، مفيش داعي يشوفك ديناصور دلوقتي ”اتمسكني لحد ما تتمكني وتاكلي براحتك“ وربنا يوفقك.

6- لو اتكعبلتي فيه على السوشيال ميديا، أول حاجة تعمليها انك تفتحي طلبات الصداقة (ADD) مش وقت تمثيل دلوقتي.. وتدخلي صفحته تعملي جرد يمكن يطلع مرتبط. لو أمان إعمليله Poke .. هتقولي يعني ايه Poke هقولك معرفش بس حاجة كده زي اللي بيرن جرس الباب ويطلع يجري. لو عمل Poke back اتقلي عليه هتلاقيه بيبعتلك رسالة بعد ساعة بالكتير وربنا يوفقك

7- لو شفتيه مع ناس أصدقائك ومش عارفة تفتحي معاه كلام، إليك يا عزيزتى السؤال السحري اللي بيفتح أي كلام في أي وقت ”انت برج ايه ؟“ لو رد وقال لك إيه ده انتي بتفهمي في الأبراج، قوليله آه حتى لو معندكيش فكرة عنها، لما يقول لك برجه، قوليله ثواني هروح الحمام وجاية، ادخلي الحمام وافتحي تليفونك واعملي سيرش على جوجل ببرجه، احفظي الصفات وارجعي سمعيهاله وربنا يوفقك.

8- في جميع الأحوال لازم تكوني بتحبي كرة القدم حتى لو كل معلوماتك عنها إن أبو تريكة كان بيلعب في النادي الأهلي.

9- آخر حاجة هاقولهالك.. وانت ليه أصلا تعملى كل ده عشان يبص لك وياخد باله منك؟ خليك زى ما انتى، وساعتها هتبقى أحسن واحدة فى الدنيا ببساطتك وعفويتك، وهوه اللى هييجى لحد عندك.

التعليقات