الحضري اعتزل اللعب الدولي .. يارجالة !

 

 

الحق يا جدع، بص يا أستاذ، تعالي يا هانم، الحضري اعتزل دولي.. قميص حماده وبلوزة غادة كُله ع العربية بسبعة ونُص.. الحق يا غلبان، الحضري اعتزل دولي.. دولي إيه اللي اعتزله الحضري يا شوية مطبلاتية؟ الحضري مبطل كورة من 8 سنين فعلياً.. ولعبه في المنتخبات على فترات في الوقت ده كان ملاطفة ومجاملة وضغوط وضيعة منه ومن الإعلاميين اللي تبعه، إحنا نسينا ماتش السعودية وحكاية مشاركته واللا إيه؟ واللا نسينا وهو بيأجَّر المنتخب واللاعيبة مفروش لمهيب وقناته وياخد منهم إتاوة في روسيا؟ واحد يقول لي معرفش عمل إيه في كاس الأمم اللي فاتت بعد ما عينه فلقت الحجر والاتنين اللي كانوا قبله اتصابوا، هقول له ماهو أي حارس يلعب قدام هجوم 90 دقيقة لازم يتصيَّت.. والموضوع في المنتخب كان ماشي كوسة رسمي علشان بيخافوا من الصوت العالي، وعلشان كده لاعبوه ماتش السعودية بعد ما الشناوي اترمى في النار ضد أورجواي وروسيا.. وبرضو اتغلبنا، هتقول لي صد مش عارف إيه وشال معرفش إيه، ما هو الشناوي شال برضو قبليه، والنتيجة في الآخر واحدة واتغلبنا برضو.. المُهم يعني ملوش داعي التهليل والحضري اعتزل دولي والحضري اعتزل دولي، لأن الدولي هو اللي اعتزل الحضري بعد ما جهاز المجاملات مشي وجه جهاز تاني مش عارفين هيجامل واللا هيبيع ماتشات واللا هيعمل إيه لسَّه.. وأرجوك متنساش اتفاق الفضيحة بتاع ماتش السعودية اللي اتكلمنا عليه قبل الماتش وحصل بالمللي.. المُهم يعني الحكاية مش بطولة، وإن كان ع الحضري فهو فعلاً معتزل من سنين والهيصة دي بس لزوم أكل العيش للمواقع والضيوف وكل اللي عايز يضرب عيارين في فرح العمدة.. آسف.. في جنازة العمدة.. قال المرحوم اعتزل قال!

( من صفحة الناقد الرياضي انور الوراقي )

التعليقات