"روقة " فتاة أحلام الشباب .. لهذه الاسباب

حقيقى أنا مش عارف سر تريقة البنات على الرجالة اللى بيحبوا نموذج (روقة).. الموضوع واضح ومش محتاج فذلكة.. (روقة) فتاة أحلامنا يا جدعان قولا واحدا.. فتاة الأحلام اللى كلنا بنلف وندور عليها ويا سعده ويا هناه اللى يلاقيه أو يلاقى جزء منه.. أنثى تحتوى البنى آدم.. تطبطب وتدلع وتساعد وتسند وتفكر وتضحّى وتقلع غوايشها وما تنكدش على جوزها.. هنحتاج إيه غير كده يعنى؟
لازم تحطوا نفسكم مكاننا.. يعنى مثلا لو جوزك بيطبطب ويدلع ويسفرك برّه ويشترى لك اللى انت عايزاه ويسندك ويديلك فلوس وعمره ما يزعلك.. هتحتاجى إيه أكتر من كده؟ احنا بقى عندنا (روقة). روقة دى زى الباز أفندى كده.. حتى لو بنت.. أنا نفسى أتمناه.
(روقة)؟ (روقة) دى النموذج يا اخوانا.. الراجل ساب بنت باشا عشانها وعشان يشترى دماغه ويرتاح من النموذج العكر بتاع الشوبنج والمظاهر الفارغة والنجاحات التافهة، بنت بلد تشيله وتريحه.. يدفن أحزانه فى حضنها.. وترص له الحجر اللى بيشدّه.. بتهتم بتفاهته م الآخر.. وبعدين أيوة احنا ناس فى البلالا وراحة دماغنا بالدنيا، بس انتوا تفاهتكم متجاوزة الحدود ومستحملينها عادى يعنى.. الواحدة اللى مخلفة عيلين وبطنها مبقللة قدامها ولسه بتوقّف جوزها فى الشارع عشان تتفرج على فساتين الفرح فى الفاترينة.. دى مش تافهة.. دى مجنونة وبنستحمل.. لأن لو شاب فى الجامعة وواقف يتفرج فى الفاترينة على آخر أشكال البامبرز يبقى عبيط.. اللى يرص لنا الحجر ندى له عنينا لا مؤاخذة.. اللى يسيبنا نقعد ع القهوة فى الملكوت نقدره.. اللى ما يكلمناش عن اللون التركواز اللى ف ضهر الأباجورة اللى كانت على ترابيزة طنط عفاف اللى زرناها السنة اللى فاتت نكرمه، وخصوصا اننا مش فاكرين طنط عفاف أصلا عشان نفتكر الأباجورة.
يقول لك: أصله نكرها لما ماتت فى البحر.. حضرتك لو (روقة) نفسها صحيت هتقول له: انكرنى عادى، واحد ومراته انتوا مالكم. تضحى عشانه يضحى عشانها.. الاتنين يموتوا.. براحتهم. وبعدين يعنى لو قال "دى مراتى" واتحبس.. كانت هتبقى مبسوطة فى تربتها؟ دى روحها كانت تطلع تتحبس مكانه وهوه يخرج.. دى (روقة) يا اخوانّا. ولو كان ممكن يضحى بروحه عشان هيه تعيش كان عمل من حبه ليها.. دى (روقة) يا اخوانّا.
يقول لك: انتوا بتفكروا فى اللى يخدمكم، مش بتهتموا بالمستوى الفكرى فى النقاش جوه البيت.. مستوى فكرى إيه يا حاجة؟ هوه بعد الجواز فيه نقاش عشان يبقى فيه فكرى؟ لو دكتورة متجوزة دكتور هيتناقشوا فى البيت عن آخر بحوث القضاء على ذبابة الفاكهة؟ هتقول له: خد الزبالة ف إيدك وانت نازل عادى جدا.. ولو (إتش آر) اتجوزت (إتش آر) هتقول له: (تيك ذا رابيش إن يور هاند وانت نازل).. عادى جدا.
وبعدين دى (نورا) يا اخوانّا.. يعنى لو (بوسى) كنت قلت لكم تغور.. إنما دى (نورا).. يعنى عيب أى كلمة ف حقها.
احنا حظنا اننا جينا فى هذا الزمن يا اخوانا.. فسيبوا لنا رمز نحتمى بيه أوقات المِحَن.. قدوة نبص لها بعين الفخر ونقول: يا سعده ويا هناه اللى يطولها.. نبراس بينور لنا طريقنا وسط سواد خناقات الاسترونج إندبندنت وومن.. حلوا انتوا مشاكل الاحتباس الحرارى ومشاكل العالم التالت فى جروبات الستات، وسيبونا ننعم بالفراغ ع القهوة ونحن نتذكر الرمز.. (روقة) يا اخوانّا.

التعليقات