جرى "حمو بيكا" مداخلة هاتفية مع الإعلامي الدكتور محمد الباز في برنامج "90 دقيقة" المذاع عبر فضائية "المحور"، أبدى فيها اعتراضه على منع نقيب الموسيقيين هاني شاكر لحفلته الأخيرة: "الأمور مش مستاهلة وعملوا مني مجرم وأنا إنسان بسيط زي أي إنسان وبفرح الناس وأعملهم حفلة ماخدش منهم فلوس وفيه ناس بتعمل حفلات التيكت بتاعها بيعدي 1000 جنيه".

وأوضح "بيكا" أنه يقدم حفلات مجانية لجمهوره: "أنا عملت حفلة مجانًا لكل الناس تيجي تحضر الحفلة بقيت مجرم واتعملي قضية واتعملي محضر بدون أي كلام وأنا معرفش أي حاجة واتوقفت عن العمل وعن الشغل".

وأبدى "بيكا" استياؤه من نشر صوره في المهن القديمة التي كان يمتهنها: "ناس بينزلوا لي الصور وأنا كنت جزار وتباع وده شرف ليا وتاج أشيله فوق رأسي وعمري ما هتبرى من أصلي وأنا راجل شقيت ياما وتعبت ياما".

وأوضح "بيكا" أنه بدأ الغناء منذ 3 سنوات ويبلغ من العمر 29 عامًا، مطالبًا نقيب الموسيقيين هاني شاكر بالوقوف بجواره: "الأستاذ هاني شاكر طالع برضه مش عارف.. أنا نفسي حد يقف جنبي وأنا مش فاهم حاجة وإيه اللي بيحصل مش فاهم".

وأبدى بيكا استغرابه لإلغاء حفله نظرًا لأنه يدفع رسوم الحفلات للنقابة باستمرار موضحًا أنه لديه إيصالات الدفع وسدد آخر مرة 3000 جنيه للنقابة، متعجبًا من قبولهم أموال ورسوم منه وعدم اعترافهم به: "أنا مش معترف بيا وأنت بتدفعني وبتقول أنا مش معترف بيا ولا بأغانينا الشعبية، أنا نفسي الناس اللي حضرت حفلتي تخش تتكلم وحفلتي كانت جميلة ومية مية وحضر فيها أكتر من 40 ألف فرد للساعة 8 الصبح".

وتابع "بيكا": "مش ذنبي أن الناس بتحبني ومأذتش حد ولقيت نفسي واقف لوحدي ومفيش أمن ومفيش حد واقف معايا يدعمني للحفلة".

وكشف بيكا تفاصيل توقيعه لعقد فيلم مع شركة السبكي: "شركة السبكي اتصلت بيا وقالوا إحنا عاوزينك معانا في فيلم وروحت واتكلمت معاهم وقالوا أنت داخل معانا في دور وقولت أنا مشكلتي واحد اتنين تلاتة مع المصنفات، وقالوا إحنا هنخلصها وروحنا ماضيين على العقد بتاع الفيلم دور تمثيل مش غناء".

وتابع "بيكا": "أنا مروحتش لحد وفرضت نفسي عليه أنا كل اللي أنا طالبه أنهم يسيبوني في حالي وانا حاسس اني عايش في البلد دي غريب ومش منها وهما محسسيني إن إحنا غرب مايقفوا جنبينا يا إما يعملوا لنا نقابة طالما هما مش معترفين بينا وإحنا مش واحد ولا اتنين اللي بيغنوا، وبيعملوا لنا نقابة وتلمنا وهما يوجهونا للصح والغلط".

وأكمل "بيكا": "الفن له جميع كل حاجة وبيطلع منه كل حاجة وانت بتتكلم ان المهرجانات بتاعتنا اسفاف وهات مهرجانات زمان بتاعت الناس اللي توفيت هتلاقيها إسفاف برضه وكله كان بيقول إسفاف ولا إحنا عشان لينا شعبية كبيرة بقى بيتقال علينا إسفاف وتلوث سمعي".

وعن مستوى الأفراح التي يحييها: "أنا النهاردة ابن مستشار بيدعيني في فرحه وأنا بنزل أفراح ظباط ياما وبنزل أفراح دكاترة ومن جميع كله وهو بيقولك الطبقة الواطية لا أنا بغني لكل الناس وهما مقسمينها طبقة عالية وطبقة واطية وكلنا أولاد تسعة وربنا اللي هيحاسب البشر".

وتابع: "بيحاسبوني على حاجة وأنا معملتش جريمة وانا كان عندي في الحفلة ناس من دار الأيتام".

وأوضح بيكا ان جميع المواطنين يسمعوا المهرجانات مطالبا الفنان هاني شاكر بالوقوف بجوارهم: "أقف جنبنا أنا واحد ماليش أي سابقة في أي قسم أو جريمة وانا ابن ناس وأهلي كلهم ناس محترمين واقف جنبي وساعدني".

واستنكر "بيكا" إلغاء عقده مع السبكي مؤكدًا أنهم هم الذين اتصلوا به وطالبوه بالعمل معهم: "أنا تعبت نفسيا".

وتدخل الفنان هاني شاكر نقيب المهن الموسيقية، لإيقاف حفل المغني الشعبي حمو بيكا الذي كان من المقرر لها أن تُقام في محافظة الإسكندرية بسبب ما أسماه بـ"الهبوط والتدني"، الذي يقدمه.

وقال شاكر في تصريحات تلفزيونية: "أخدوا أكبر من حجمهم بكتير، مش واخدين تصاريح أو موافقات ولا منتسبين للنقابة، واللي بيعملوه شيء ملوش علاقة بالفن".