وانت طالع من عرض حلو في سينما (امير ) وداخل علي محطه الرمل عن طريق شارع صفيه زغلول حتلاقي في وشك مطعم وبار كده كده شكلهم قديم شويه.

 

أقف هناك واقرا الفاتحه عن روح قصه حب عظيمه كانت في المكان ده من اكتر من ٦٥سنه بطلها شاعر يوناني اسمه (كفافيس) وبنت يونانيه اسمها (كريستينا )!

 

الشاب حب البنت اللي من اسره غنيه نسبيا اسمها (كوستانتيو) بس لانه شاعر ولان اليونانيين طباعهم قريبه من طباع المصريين حبتين ،،طبعا الأهل رفضوا جوازهم وقالوا انه معهوش شغلانه محترمه يأكل منها عيش ...

الولد سافر عاليونان يشوف مستقبله بعد ما كسروا قلبه ...بس عمره ما نسي حبيبه (كريستينا) وبقي يكتب قصائد عظيمه هي بطلتها !

 

والبنت اتجوزت وخلفت ولد اسمه (ماسيوس) _وعمرها ما نسيته هي كمان _وفِي خلال سنين قليله اشترت المحل او (الدكان)زي ما كانت بتحب تسميه من صاحبه اللي سافر اليونان سنه ١٩٥٣.

 

سنين وهي محافظه علي الدكان وبتقدم افخر انواع الأكلات المصريه واليونانية ..

 

المكان اشتهر جدا _وهو كان معروف من الاول الصراحه بس زادت شهرته بعدين _ وعملت حركه حلوه بما انها اصلا عاشقه وكانت بتقابل حبيبها فيه كل يوم قبل ما يتفرقوا استضافت الرسامين وعلي رأسهم (سيف) علشان يرسموا الزبائن في المحل

سيف الرسام المعروف كان بيرسم وشوش الزبائن علي هيئه بورتريه علي علبه سجاير !

ويبيع العلبه والبورتريه اللي عليها بجنيه واحد ! في الوقت اللي كان فنجان القهوه في #ايليت اللي هو المطعم نفسه بربع جنيه !

 

المكان اشتهر بقه لما كفافيس رجع اسكندريه تاني بعد ما بقي من أشهر شعراء اليونان _حاجه زي الأبنودي كده _ وراح يقابل حبيبته وملهمته هناك !

ايووووه يا جدع بالاسكندراني علي اللي حصل هناك .

الناس بقه عرفت القصه وكده وانهال عالمطعم بقه مشاهير الفن مصريين واجانب داليدا ،نجيب محفوظ ، ديميس روسوس المغني اليوناني الشهير .

كمان المحل بقه مليان لوحات لكبار الرسامين ادهم وسيف وانلي .

كمان كريستينا كانت بتصر ساعات كتيره انها تلبس الجلابيه وتقعد بيها في المحل اعتزازا انها مصريه من أصل يوناني !

حاله الحب اللي بتبقي في الأماكن هي اللي بتشد الناس مش اَي حاجه تاني !

وده يفسرلك ليه مهما تعمل في كافيه اتبني في انضف مول في التجمع او في دبي مش حتبقي زي كشك خشب في اسكندريه !

ابنها ماسيو(٦٠سنه ) اللي سافر باريس اتعلَّم الفن ورجع بقاله فتره قافله وفيه كلام انه اتهد او حيتهد ويتعمل مكانه حاجه تاني !

بس الشاهد انه عمره ما حيرجع زي ماكان ايّام كريستينا وكافكس !