«ربنا يقدرك على الناس عديمة الإحساس».. النجوم يدعمون رامي جمال بعد إصابته بالبهاق

حالة من الدعم قدمها نجوم الفن للفنان رامي جمال عقب إعلانه التفكير في الاعتزال بسبب إصابته بمرض البهاق.

وفور نشر جمال رسالته عبر موقع الصور «انستجرام»، انهالت التعليقات عليه من النجوم، فقال حمدي الميرغني: «ربنا يشفيك يا رامي ده مش حاجة أصلاً ده الصداع أصعب منه ياخويا الناس كلها بتحبك، وكل ما تشوفني احمد ربنا واعرف إنك في نعمة».

وعلق المذيع خليل جمال: «تفتكر إن رب البلاء مش رب الفرج والرحمة والصبر؟ ربنا يديك الصحة ويخليك لحبايبك يا رامي، وكل الدنيا معاك وف ضهرك».

بينما علقت الفنانة لطيفة: «حبيب قلبى يا رامى يا مبدع يا محترم يا مختلف اوعى تفكر كده أول حاجة لازم تقول الحمد الله على كل حاجة ربنا يكتبهالنا، تانى حاجة دى حاجة حصلت لناس كتير واتعالجت منها الحمد الله وبعدين إحنا بنحبك على موهبتك وفنك الرائع وكل جمهورك، وأنا منهم، بنبقى مستنيين جديدك دايما».

وقالت الفنانة إيمان العاصي: «حبيبي يا رامي انت أقوي من أي حاجة وفنان وموهوب ونجم وكل ده ولا حاجة قصاد نجاحك وحبك لفنك، ربنا يقدرك على الناس عديمة الإحساس، ربنا يخليلك ناريمان بالدنيا»، وقالت الفنانة إيمي سالم: «كمل واعمل اللي بتحبه واحنا معاك وف ضهرك».

كان رامي جمال قد أعلن إصابته بمرض البهاق، بعد ظهور بقع بيضاء اللون بمناطق بجسده، وقال عبر فيس بوك: «الحمد لله الذي أحبني فابتلاني وقدرني على الصبر.. من فترة ظهرت بقع بيضا في جسمي وبالكشف عرفت إنه مرض البهاق، وجربت أنواع علاج كتير ودكاترة كتير ومفيش فايدة».

التعليقات