نزلت الزمالك أشتري حاجة فدخلت الدكان لقيته بيتفرج في التلفزيون على فيلم فيه أحمد عز لابس ظابط....وشكله في مرحلة مابعد البوتوكس فأكيد الفيلم جديد... فسألت الراجل البياع ده فيلم ايه؟  فرد وقاللي فيلم الممر !!؟؟  وحاولت أقرا اسم القناة ولأن الشاشة من النوع القديم فجزء من اسم القناة كان مش باين وكل اللي قدرت أقراه هو "ربكة"  فقلت للراجل إنت ليه بتتفرج على نسخة مسروقة؟  الفيلم ده حايتذاع الساعة ١٠ بالليل على قناة أون بجودة عالية بدل النسخة الوحشة دي.... قاللي يابيه بالليل مابنكونش فاضيين نتفرج... وبنروح ناكل لقمة وننام ...وبعدين أهو نفتكر الأيام الحلوة دي مرتين تلاتة في اليوم مش مشكلة... فمشيت طبعا لأني مش محامي الفيلم ولا القناة اللي شارياه حصري ... وهو غير مدرك إطلاقا إنه بيعمل شيء غلط بمشاهدة القنوات القراصنة..فتضييع وقت ليا وله

ولكن...أولا إزاي سايبين قنوات زي دي تذيع محتوى مسروق؟  هل هما بيبثوا من قمر تاني ومالناش سيطرة عليه؟  وثانيا القناة اللي تحت السلم دي عرفت إمتى تذيع الفيلم في وقت ممكن العيلة كلها تكون في البيت في يوم أجازة... الكل كسلان وبالبيجامات ومافيش حاجة تتعمل... مش كان أولى إننا نذيع الفيلم مرة صباحا علشان أطفالنا يشوفوه ويفتخروا بجيشهم...وبعدين نعيده بالليل في البرايم تايم براحتنا بقى...إنما إختيار البريميير يكون متأخر بالليل في ليلة شغل ومدارس هو إختيار تعجز الكلمات عن وصفه الحقيقة... إنما أنا ايشفهمني في فنون البث التلفزيوني...الحاجات دي لها ناسها.

*بوست للاعلامي والمنتج عمرو قورة - من صفحته