انفراد.. تعرّف على اختبار لجنة التمثيل!

تجلس لجنة اختبار الممثلين وأمامها عادل.. واثق جدا من نفسه

محكم 1: وانت جاى اختبارات التمثيل ليه بقى ياعادل؟ عايز تبقى إيه يعنى؟
عادل: مرضعة ياباشا.. ما أكيد يعنى جاى اختبارات تمثيل عشان ابقى ممثل يعنى
محكم 1: يا بنى أنا قصدى عايز تبقى ممثل ليه.. الفلوس وللا الشهرة وللا إيه؟
عادل: بصراحة عشان بيدخلوا السينما ببلاش ياباشا فى العروض الخاصة
محكم 2: عايز تبقى ممثل عشان تدخل السينما ببلاش؟
عادل: وممكن اساهم فى تمن التذكرة كمان ياباشا لو تذكرتى هتأثر على صناعة السينما
محكم 1: طيب انت مثلت قبل كده؟
عادل: يووووووه.. ما تعدش.. ومع أكبر مخرجين مصر
محكم 2: بس احنا عمرنا ماشفناك ف فيلم
عادل: ده عشان بس ياباشا انتوا بتهتموا بتفاصيل صغيرة فى الأفلام.. النجوم.. الديكور.. الخارجى والداخلى.. انما بتنسوا أدوارى أنا ياباشا..
محكم 1: وانت بقى مثلت فين قبل كده؟
عادل: عارف حضرتك الأستاذ صلاح ابو سيف؟
محكم 2: مثلت مع صلاح أبو سيف؟
عادل: لا ياباشا.. أنا بس باقول لك عارف صلاح ابو سيف.. أنا باحبه قوى يعنى
محكم 1: يابنى قول لنا مثلت فين قبل كده؟
عادل:  لو فاكر ياباشا مشهد المظاهرة الكبيرة فى جامعة القاهرة فى فيلم الانتفاضة.. فاكرينه؟ أنا بقى اللى كنت لابس احمر فى المظاهرة
محكم 2: صلاة النبى.. واحنا بقى هنمقق عينيا عشان نشوف حضرتك فى المظاهرة؟
عادل: ياباشا مش باقول لك بتنسوا أهم حاجة فى الفيلم.. يعنى مثلا فى المظاهرة أنا اللى كنت ساند على العمود.. لو سبت العمود كان زمانه وقع على المظاهرة والمشهد باظ والفيلم كله وقف
محكم 1: ما علينا.. طب مثلت فين تانى؟
عادل: مثلت فى المظاهرة بتاعة فيلم الثورة.. والمظاهرة بتاعة فيلم ياحكومة لا.. والمظاهرة بتاعة فيلم سيبونا بقى.. وكلهم كنت ساند ع العمود ياباشا
محكم 2: انت كل شغلك مظاهرات؟ وأدوار صامتة كمان؟
عادل: أصل أنا سكوتى من ذهب ياباشا
محكم 1: طيب ممكن تمثل لنا دور بسرعة؟
عادل:  ممكن أمثل دور انفلونزا حلو قوى
محكم 1: انت بتهزر.. اتفضل مثّل.. هتمثل مشهد إيه؟
عادل: ممكن أمثل حتة من مشهد محمود المليجى فى فيلم الأرض وهو مسحول على الأرض
محكم 2: طب كويس.. اتفضل خلصنا
يقف عادل صامتا تماما وينظر فى الفراغ
محكم 1: ما تمثل يا بنى.. فين المشهد؟ فين محمود المليجى
عادل: ومين قال انى هامثل دور محمود المليجى؟ ياباشا انا بامثل دور عزت العلايلى كان واقف وخلاص فى المشهد.

التعليقات