يدخل فادي مع لبنى إلى الكافيه.. يبدو على لبنى الزهق والإرهاق.. فادى يرتدى نظارة طبية ويبدو عليه الهندام.. ويتكلم بسهوكة

لبنى: أنا زهقت يافادى من حالنا كده؟
فادى: ليه بس ياحبيبتى.. ما انا فسحتك أهوه
لبنى: وهيه دى تسميها فسحة؟ واخدنى المؤتمر الدولى الطبى العاشر لطب العيون والقرنية والننى.. انا مال أهلى بإنك دكتور عيون
فادى: ياحياتى لازم تقربى من تخصصى عشان لما نتجوز يبقى فيه توافق
لبنى: نتجوز؟ هيه باين لها جواز؟ دا احنا من تسع سنين مخطوبين
يحدثها بحنان كأنه غير مهتم بالمدة
فادى: وياترى لسة بتحبيبنى ياحياتى؟
تصرخ لبنى
لبنى: احنا ف إيه وللا ف إيه؟ دانا عشان باحبك استنيت تسع سنين.. أمال لو باكرهك هاستناك قد إيه؟
فادى: ساعتها هنتجوز علطول بس مش هيبقى فيه حب بينا.. هتبقى قاعدة فى البيت كانك كنبة وللا كرسى
لبنى: ياسيدى أنا دولاب ضلفتين أساسا.. بس نتجوز بقى
فادى: ما انتوا اللى طلباتكم أوفر يا حياتى
لبنى: أوفر.. شقة أوضتين.. وحمام.. أوفر؟ أقول لك بلاش حمام.. هننزل الجامع كل شوية..
فادى: مش مكفيك ياروحى انى حاطك فى عيونى
لبنى: بلاش عيونك دى.. ده لولا النضارة كان زمانك جارر واحدة غيرى ف إيدك دلوقتى على إنها أنا
فادى: ده انا نظرى ستة على ستة بالنضارة وعملت ليزك وظبطت تشعبات القرنية وبعض العروق الموجودة فى القزحية والننى......
لبنى: بسسسسسس.. زهقت من نشرة العيون دى.. كرهت أغنية عيون القلب أساسا.. ماتجيبليش سيرة انك دكتور عيون.. مش كفاية كل شوية تفتح عنيا وتكشف
فادى: ياحبيبتى آخر دراسة لطب العيون أثبتت ان كل ما الواحدة تحب أكتر كل ما عنيها تبقى سليمة اكتر
لبنى: ياسيدى أنا عامية أساسا.. احبسنى واعمل عليا تحاليل بس اتجوزنى الأول.. ماما كل شوية تكلمنى
فادى: وياترى بتجيبوا سيرتى؟
لبنى: يالهوى.. أمال بنتكلم فى مشكلة دار فور؟ بتسألنى هتتجوزوا امتى؟
فادى: دايما ماما مستعجلة كده؟ من أول ما اتقدمت لك من تسع سنين وانا مفهمها هيه وعمك وخالك انى مبحبش حد يستعجلنى
لبنى: حضرتك.. أنا عمى مات. وخالى مات.. وماما جالها السكر.. واحنا لسة مخطوبين
فادى: يالبنى ياحياتى أهم حاجة الحب.. مش مهم الوقت.. طول ما عيونك سليمة وبتحبينى هنتجوز بسرعة
لبنى: قلتلك ماتجيبش سيرة عنيا.. خلينا فى الجواز
يقترب منها فادى فى دلال.. ويخرج وردة جميلة من جيبه
فادى: حاضر.. انا باحبك يالبنى.. طب شوفى انا جايب لك إيه؟ وردة جميلة لأحلى عيون تشوفهم فى الدنيا
تتغير لبنى قليلا وتخفض صوتها
لبنى: دول عشانى أنا
فادى: طبعا ياروحى.. شايفة الورد دى؟
لبنى: أيوة ياحبيبى
يبعد الوردة بعيدا ويسألها كأنه يكشف على عينها
فادى: طب وكده؟
تصرخ لبنى: يا لهوىىىىىىىىىىىىى