بشرى سارة.. وسيلة سريعة للتغلب على العنوسة!

تجلس وفاء فى الكافيه منكوشة الشعر وغير مهندمة وفظة فى الكلام.. وبجوارها سعاد فتاة أنيقة بعض الشيء

سعاد: والله واحشانى من زمان ماشفتكيش ياوفاء.. انت جالك الفارس اللى ع الحصان الأبيض وللا إيه؟
وفاء: والله ولا سمكرى على بغلة سودا.. دا انا قاعدة مستنياهم ولا كأنى مستنية قطر مصر اسكندرية القشاش
سعاد: انت لسة من ايام الجامعة ماتجوزتيش لدلوقتى؟
وفاء: اتجوزت 8 مرات
سعاد: 8 مرة واحدة
وفاء: أيوة 3 مرات حلمت بيهم انا.. وخمس مرات ماما حلمت لى بيهم
سعاد: يعنى انت ماتجوزتيش فى الحقيقة؟ وإيه اللى مش مخليك تتجوزى
وفاء: مفيش.. مشغولة شوية فى الاستعداد لانى اتجوز.. مش فاضية اتجوز حد خالص
سعاد: طب مفيش عرسان بييجوا؟
وفاء: فيه ذكور بيمشوا فى الشارع طبعا.. بس عند البيت بتاعنا مفيش.. الرجالة على حظى اتأدبوا يا سعاد
سعاد: بس انت سنك بدأ يكبر يابنتى ولازم تاخدى بالك
وفاء: أعمل إيه يعنى؟ أتجوز زوج أنابيب؟ أعمل لى واحد عمولة بالشاحن بكرتونته؟ ما انا متزفتة مستنية
سعاد: مع ان الجواز مش حلو زى ما انت فاكره.. ما انا اتجوزت واتطلقت.. الجواز كله هم
وفاء: ياستى طب انا اتجوز ومستعدة أمثل فيلم نحن لا نزرع الشوك.. بس اتجوز ياناس
سعاد: طب يعنى إيه اللى بيحصل معاك؟
وفاء: كل ما حد يكلمنى يقول لى مفيش شغل..والظروف والاقتصادية.. والأزمة العالمية.. ومشكلة العولمة واتفاقية الجات.. أنا راحة اتجوز أوباما؟
سعاد: معندهمش شقة يعنى؟
وفاء: شقة؟ ده انضف واحد جالى بينزل يدخل حمام الجامع.. أول مرة اعرف اننا عايشين فى أزمة
سعاد: ياسلام.. انت أول مرة تعرفى اننا عايشين فى فقر وظروفنا وحشة
وفاء: انتوا بتعرفوا من النت.. وانا مش بادخل نت غير عشان مواقع الجواز.. أنا إيميلى بقى أشهر إيميل معروف هناك.. لدرجة ان مدير موقع منهم عرض عليا يجوّزنى اتنين بسعر واحد
سعاد: ربنا معاك.. كنت فاكراك اتجوزت وبقى عندك ولاد؟
وفاء: تعرفى؟ بقيت عايزة اخلف ان شالله ضفدعة.. ضفدعة صغيرة تملى عليا البيت.. أوديها بنفسى الترعة كل يوم تتعلم النقيق.. بس أجيبها الأول ياناس
تخرج وفاء من شنطتها زجاجة برفان فى زهق وتعطر نفسها كى تشعر الانتعاش

سعاد: ريحته حلوة البرفان ده؟ بس إيه ده.. ده برفان رجالى
وفاء: ما انا عارفة.. ده انا جايباه مخصوص
سعاد: وليه كده؟
وفاء: ياختى هيبقوا لا هما ولا ريحتهم؟!

التعليقات