يدخل الزوج فيجرى عليه الأولاد وأمهم جالسة على الكنبة

الأولاد: بابا جه.. بابا جه
الزوج: ازيكم ياولاد.. ازيك يافوزية
الزوجة: قبضت؟
الزوج: انت بتخرسى 29 يوم فى الشهر وتيجى فى اليوم التلاتين تقولى الكلمة دى؟
الزوجة: ياخويا وانا عايزة منك إيه غير القبض؟ مابلاش نتكلم احسن
الزوج فى خجل: قلبك اسود يافوزية.. أيوة قبضت ياستى بس يارب الفلوس تكفى نص الشهر حتى.. الشهر اللى فات المرتب خلص يوم أربعة..
يضع الفلوس على الترابيزة
الزوج: آدى 1500 جنيه تعالى نحسب بقى ونوزع الفلوس على المصاريف
الزوجة: هيه محتاجة حساب.. 1500 جنيه يعنى 600 جنيه إيجار و900 جنيه أكل وشرب وعلاج وهدوم ومواصلات ومدارس والذى منه
الزوج: ياولية بلاش تسدى نفسى كده.. حسسينى اننا محتارين نعمل إيه بال1500 جنيه دول.
الزوجة: ماشى ياخويا.. يااااااه.. ياترى هنعمل إيه بال600 جنيه إيجار؟ ياترى هندفعهم إيجار وللا نديهم لصاحب العمارة عشان الإيجار وللا نديهم للبواب عشان الإيجار؟ حيرة فظيعة
الزوج: مابناخدش منك غير كلام، انت تحمدى ربنا بدل التريقة.. أمال لو زى غيرى كان مرتبى 1200 جنيه كنا هنعمل إيه؟
الزوجة: كنت هاقعد على باب السيدة واسرح العيال على المواقف
يجرى عليه ولده
الولد: بابا بابا.. انا عايز آكل لحمة
الزوج: اللحمة مضرة ياحبيبى عشان بتجيب أمراض
الولد: اصحابى بياكلوها يابابا ومش بيحصلهم حاجة
الزوج: ياحبيبى لو اشترينا لحمة دلوقتى ممكن الجزار يغشنى ويدينى أى حاجة تانية عشان أنا نسيت شكلها

يبكى الولد فيطبطب عليه الأب.. ويأخذ مئة جنيه من ال900 ويضعها فى جنب

الزوج: خلاص ماتزعلش هنجيب لحمة.. ناخد من فلوس الاكل 100 جنيه عشان اللحمة
البنت: بابا بابا.. نفسى ف حاجة باشوفها مع اصحابى اسمها تفاح
الزوج: ياااااه.. فين أيامه.. فكرتينى بأيام زمان يابنتى.. كان تفاح تفاح يعنى مش زى بتاع اليومين دول
الزوجة: هوه انت كنت دوقته اليومين دول عشان تحكم؟
يصرخ فيها بغضب ويأخذ 50 جنيه من ال800
الزوج: بطّلى تدخلى أحلامى كده.. هناخد 50 جنيه نجيب تفاح للعيال مش عايزينهم يبقوا محرومين
الزوجة تأخذ 550 جنيه من ال750 المتبقيين
الزوجة: فواتير الكهربا والمية والتليفون جت وأنبوبة البوتاجاز فضيت. يعنى كلهم حوالى 550 جنيه
يمسك الزوج ورقة المئتين جنيه المتبقية فى احتقار
الزوج: ودى مش هتكمل دروس العيال
يمد يده على 600 جنيه الإيجار فى الجانب الآخر من الترابيزة
الزوج: خلاص ناخد من الإيجار
تمسك الزوجة يده
الزوجة: كده هنبقى بقالنا خمس شهور مادفعناش
يلم كل الفلوس فى سرعة ويقف
الزوجة: رايح فين؟
الزوج: مفيش.. هاروح الشغل تانى.. ارجع الفلوس للحكومة.. كده كده هما مش مكفيين.. جايز الحكومة تحتاجهم عشان تبنى كوبرى وللا حاجة.. وانت جهّزى لبس السيدة زينب ووزعى العيال على المواقف على ما آجى!