وفاة زوج بسبب مشاهدة زوجته للتليفزيون!

يدخل الزوج قادما من الخارج، زوجته منهمكة تماما فى الفرجة على قنوات الدش
عادل: ازيك ياسعاد
سعاد: أهلا
عادل: هوه انا ماشوفكيش ابدا غير وانت قدام الدش ده؟
تحدثه دون أن تدير وجهها من التليفزيون
سعاد: ليه مانت بتشوفنى وانا نايمة
عادل: دا انت حتى وانت نايمة بتخطرفى.. مهند.. نور.. ميرنا.. خليل
سعاد: فكرتنى بمهند ليه بس ياعادل.. المسلسل قرب من نهايته.. معدش فاضل غير ستين حلقة بس
عادل: يا مثبت العقل.. طب فين الأكل؟
سعاد: هتلاقيه فى التلاجة.. هتلاقى بيتزا بعصير القصب وبامية بالمربى ومكرونة بالخشاف
عادل: آه.. ده على اساس انى آكل واحلِّى فى نفس الوقت.. اتنين فى واحد بلسم وشامبو يعنى
سعاد: ده بدل ما تشكرنى انى باوفر وقتك.. عاملالك اصناف من قناة الطبيخ فى الدش حكاية
عادل: أصناف إيه؟ دا انا بقالى شهور مش باعرف اقول لاصحابى انا اتغديت إيه عشان أنا مش عارف اصلا
سعاد: انت مش بتقرا الورقة اللى باكتبها على كل طبق وعليها اسم الصنف
يشد شعره فى نرفزة
عادل: ياعالم.. هاتغدى بكتالوج؟ نفسى طبيييييخ احمر وفيه بطاطس بس.. شوربة وفيها لسان عصفور بس.. نفسى احس ان البرتقان رجع فاكهة تانى مش طبيخ
سعاد: اسكت بقى خلينى اتفرج.. برنامج الأكل هييجى دلوقتى على تلاتة ونص
عادل: خلاص مش عايز آكل.. وأخبار العيال إيه؟
سعاد: الساعة تمانية ونص
عادل: إيه اللى تمانية ونص؟
سعاد: برنامج أخبار العيال بييجى الساعة تمانية ونص
عادل: ياهانم انا اقصد عيالك سمير ورنا
سعاد: سمير ورنا؟ آآآآآآه.. سمير راح الدرس فى نص مسلسل نور كده.. ورنا راحت لجارتنا ساعة أول برنامج الديكور
يرن جرس الباب
عادل: كويس.. أهو جرس الباب بيرن يارب تبقى صاحبتك عشان تتكلمى معاها وترحمينى من الدش ده
تدخل مروة
عادل: أهلا يا مروة اتفضلى
تتقدم وتجلس بجوار سعاد وتقزقز اللب معها
مروة: ازيك يا سعاد.. أنا جاية عشان اتفرج معاك على برنامج شريف مدكور.. القعدة مع بعض أحلى
يغتاظ عادل جدا فيمشى بهدوء خلف ظهرهما ويشد فيشة التيار الكهربائى.. لكن سعاد ومروة لا يلتفتان ويكملان النظر للتليفزيون
عادل: انتوا مش ملاحظين ان الكهربا قطعت؟
سعاد: ملاحظين.. بس مثبتين نفسنا ع الوضع ده عشان لو جت فجاة مايضيعش لقطات
عادل: طب ما تتكلموا حتى
تلتفت كل منهما للأخرى فى آلية وترغى بسرعة شديدة بينما هو يشد فى شعره
مروة: عندك حق.. شفتى حلقة كوثر لما سابت خليل وراحت لعشيقها.. هيه عملت كده عشان......
عادل: ياربى
يجرى فيشغل التليفزيون من جديد
سعاد: الحمد لله هنلحق البرنامج
يمسك قلبه من الغيظ ثم يقع مغمى عليه.. تتحدث مروة بآلية ولا مبالاة إلى سعاد وهما يقزقزان اللب
مروة: جوزك وقع ياسعاد.. شكله أغمى عليه
سعاد: ان شاء الله خير.. عموما برنامج صحتك بين إيديك جاى على خمسة ونص ممكن نعرف منه حاجة لحالته.. قزقزى قزقزى

التعليقات