أشياء لا يعرفها الجميع عن "فيس بوك"!

تجلس فوزية الجدة وبجوارها محسن الشاب حفيدها منهمك فى اللاب توب.. فوزية عمرها حوالى 90 سنة

فوزية: ياااااه يا واد ياعادل.. لو شفتنى فى السبعينات ايام ابتدائى.. كانت المهندسين كلها بتجرى ورايا كده من جمالى
محسن: المهندسين كلها
فوزية: بصراحة مش كلهم.. شوية منهم.. كان فيه أطباء وصيادلة برضه
محسن: يا تيتة.. أولا انت كنت فى ابتدائى ايام الأربعينات أساسا مش السبعينات.. وبعدين مدرستك كانت فى بولاق مش فى المهندسين.. وبعدين أنا حفيدك واسمى محسن مش عادل
فوزية: محسن؟ شوف ابوك الواطى.. من ساعة ما خلفك وهوه معشمنى انه هيسميك عادل على اسم جدك
محسن: ياتيتة أنا جدى اسمه إسماعيل
تضربه بيدها
فوزية: ماتخرس بقى.. شايفنى عندى تسعين سنة وزهايمر.. لمّ نفسك وسيبنى اهرتل.. قول لى بتعمل ايه على المنبه ده؟
محسن: ده مش منبه.. ده لاب توب.. وانا دلوقتى على الفيس بوك
فوزية: وإيه الفيس بوك ده؟ مقرر على سنة كام؟
محسن: ده موقع ممكن يجيبلك كل اصحابك القدام
فوزية: بجد؟ يعنى أنا ممكن ألاقى كل أصحابى بتوع الابتدائى؟
محسن: اللى فاضل منهم
فوزية: اللى فاضل منهم؟؟ هيه المدرسة اتهدت عليهم بعد ما سبتها؟ ماتوا صغار يا حرام.. باقول لك إيه مش أى حد هادور عليه ألقاه هنا؟
محسن: أيوة ياتيتة لو كان موجود
فوزية: طب شوف لى كده عم عبده بتاع اللبن.. أصله مجاش من يومين
محسن: ياتيتة عم عبده إيه بس؟
فوزية: طب خلاص.. شوف لى عم عطية الفرارجى.. اسأله كيلو الفراخ أم انفلونزا بكام واللى من غير انفلونزا بكام؟
تلاحظ غضبه الشديد
فوزية: خلاص خلاص.. مادام ممكن تجيب اصحابى بتوع زمان.. اكتب كده اسم سنية عبد العاطى
محسن: حاااااضر.. مش موجودة.. هيه كانت صاحبتك دى؟
فوزية: لا.. دى الست العجوزة مرات البواب بتاع مدرستنا
محسن: ياتيتة.. يعنى ست عجوزة أيام الاربعينات هتبقى عايشة لدلوقتى؟ شوفى لنا حد من زمايلك وخلصينا بقى
فوزية: مش تقول كده؟ خلاص.. اكتب سعد عبد الموجود.. ياااااه ياسعد.. كانت أول قصة حب فى حياتى ايام ابتدائى.. تعرف؟ زى ما فيه دلوقتى عمر وسلمى.. كان فيه سعد وفوزية.. قصة حب ملتهبة.. معلش بقى يامحسن.. بافضفض لك عن انحرافاتى..
محسن: فيه واحد هنا اسمه سعد عبد العاطى.. وصورته اهيه.. هوه ده؟
فوزية: هوه سعد حبيبى.. ياحلاوته ياجماله.. من ايام ابتدائى ماشفتوش
يدقق فى الصورة لرجل كبير
محسن: ياتيتة واحد ماشفتيهوش من ابتدائى.. كان عنده شنب ودقن ازاى؟
فوزية: هوه ده شنب؟ دا انا فاكراها عاهة مستديمة وقلبت بشعر.. عموما اكتب له انى مستنياه.. وهنقضى العمر كله سوا
تتحدث ببطء وتفقد وعيها فجأة.. يفزع محسن ويوقظها
محسن: تيتة.. تيتة.. العمر كله راح قبل ما تقابليه
تقوم فوزية فجاة
فوزية: باقول لك ايه.. ما تشوف جدك عندك كده.. القرافة قريبة ويمكن تلاقيه.. واللى نعرفه احسن من اللى مانعرفوش
 

التعليقات