نصائح زوج ملياردير لكل شاب مصري

المذيعة: أهلا وسهلا بحضراتكم فى برنامج "رجال ناجحون".. بنتكلم عن دور المرأة فى حياة الناجحين.. وضيفنا النهاردة رجل الأعمال الناجح وجدى بيه.. أهلا بيك
وجدى: أهلا وسهلا بيكم يافندم
المذيعة: هل ممكن حضرتك فى البداية تقول لنا قصة التعرف بين حضرتك ومراتك؟
وجدى: والله باباها قفشنا فى جنينة الحيوانات.. طلع المسدس وقال لى لازم تصلح غلطتك وتسعد البنت
المذيعة: وعملت إيه؟
وجدى: بوستها قدامه.. وقلت له هيه كده سعيدة.. بس للأسف شخط وبهدلنى فاضطريت اخطبها
المذيعة: نفهم من كده ان بداية قصة جوازك كانت ظرف اضطرارى؟
وجدى: ولحد دلوقتى يافندم
المذيعة: وبعد كده بدأت قصة كفاحكم بعد الزواج
وجدى: هيه قصة كفاحى أنا بصراحة.. لأنى بدأت اتعلم غسيل الاطباق ومسح وكنس الشقة وغسيل الهدوم.. لدرجة انى بدأت اقتنع ان الإنسان أصله فلبينية
المذيعة: من صور حضرتك وانت شاب لقينا ان انت اتخن دلوقتى وده دليل على الراحة
وجدى: لا حضرتك.. أصل وانا عازب كنت باروح التلاجة مالقاش حاجة احبها اروح ع السرير.. دلوقتى باروح السرير مالقاش حاجة احبها اروح ع التلاجة
المذيعة: طب ممكن تقول لنا أحلى ضحكة صافية ليك كانت قبل الجواز وللا بعد الجواز؟
وجدى: أنا من بعد الجواز ماضحكتش اصلا
المذيعة: هل زوجة حضرتك من الستات اللى ثابتة على رأيها؟
وجدى: طبعا.. لدرجة ان من عشرين سنة وهيه ثابتة على ان عمرها خمسة وعشرين
المذيعة: بس معظم الصور اللى احنا لقطناها لكم دايما كانت إيديكم فى إيد بعض.. ده قمة الحب
وجدى: لا حضرتك أصلى لو سبت إيديها هتروح تشترى أى حاجة.. مسك الإيد باوفر بيه فلوس
المذيعة: بس حضرتك شكلك مش مبسوط من الجواز.. انت عارف حضرتك إيه معنى انك تدخل بيت تلاقى زوجة حنون وأكل نضيف وهدوم جاهزة وجو هادى؟
وجدى: آه طبعا عارف.. معناه انى دخلت شقة غلط
المذيعة: طب ممكن نعرف مين فيكم المتحكم فى البيت وصاحب الكلمة؟
وجدى: أنا طبعا المسيطر والحاكم فى البيت.. مراتى بس بتصدر القرارات وخلاص
المذيعة: طب احنا بس مستغربين حضرتك ليه متضايق من الجواز.. رغم انك ناجح ومليونير.. افتكر انت كنت إيه قبل الجواز؟
وجدى: كنت ملياردير حضرتك!

التعليقات