دليلك لحجز قاعة أفراح بأرخص الأسعار!

يدخل العريس والعروسة على مسئول قاعة الأفراح.. يشبكان يديهما فى حب وهيام
المسئول: أهلا يافندم.. نورتونا
العريس: الله يخليك.. لو سمحت عايزين نحجز قاعة لفرحنا الشهر الجاى
المسئول: قاعة الوردة وللا قاعة الشجرة؟
العريس: ياسيدى الاتنين بيتنفسوا ثانى أكسيد الكربون مش هتفرق.. انجز
المسئول: قاعة الوردة محجوزة 4 شهور قدام.. وقاعة الشجرة تلاتة
ينظر العريس فى عين حبيبته بهيام
العريس: طب والحل ده احنا بنحب بعض قوى ومش هنقدر نصبر
المسئول: عشان خاطر حبكم بس.. ممكن تقدم الحجز وتحجز بس هتدفع الضعف يعنى عشرين ألف جنيه زيادة
العروسة: وهيه القاعة أصلا بعشرين ألف جنيه؟ والقاعة دى شاملة إيه؟
المسئول: شاملة القاعة يافندم بكل حيطانها وسقفها
العريس: طب كويس انكم جبتم حيطان تستر الناس.. صلاة النبى.. أمال المعازيم هيقعدوا فين؟
المسئول: آه حضرتك محتاج كراسى.. مش تقول يافندم؟
العريس: معلش أصلى كنت ناوى اقعَّد المعازيم على رجلى انا والعروسة.. الكراسى بكام ياخويا؟
المسئول: الكرسى بخمسين جنيه يعنى حوالى عشر تلاف جنيه الكراسى كلها
يبدأ العريس بالتشويح بيد العروسة التى فى يده فى عنف
العريس: وعلى إيه؟ يفرشوا مفارش الترابيزة على الأرض ويقعدوا
المسئول: مش لما حضرتك تأجر ترابيزات الأول وكمان تأجر المفارش؟
العروس: طيب وبالنسبة للهوا داخل القاعة حضرتك مش هنأجره؟
المسئول: لا يافندم.. الهوا والاستنشاق مجانى داخل القاعة (كادو) منا للعروسين.. عموما الترابيزات والمفارش مش هتتجاوز العشر تلاف جنيه
العريس: طب ممكن نعرف بروجرام الحفلة؟
المسئول: بروجرام جميل.. هتنزلوا من العربية تيجوا جرى تقعدوا على الكراسى مع المعازيم
العريس: مع المعازيم؟ ليه؟ هوه مفيش كوشة؟
المسئول: سبحان الله هوه انا اعترضت يافندم؟ اكيد فيه كوشة بس حضرتك ما قولتليش
العريس: أصلى كنت مقرر اننا نفرش على الأرض ونربع رجلينا.. ياعم خلصنى الكوشة بكام؟
المسئول: الكوشة بمستلزماتها زى الشمع والورد والدخان والتورتة والدى جى.. كل ده بتخفيض مننا هيبقى ف حدود عشرين ألف جنيه
العروس: طب واحنا هنجرى على الكوشة علطول؟ مفيش زفة؟
المسئول: الزفة البلدى بخمس تلاف.. الأفرنجى بعشرة
العريس: شد السيفون
المسئول: نعم؟
العريس: بلدى وافرنجى.. يبقى شد السيفون
المسئول: عموما يافندم ليلة فرحكم السعيد مش هتزيد عن 100 ألف بس بالتخفيض.. وعقبال الأولاد
العريس: مفيش أولاد
ينظر لحبيبته فى غضب
العريس: انت طالق!

التعليقات