جواز تحت التهديد!

يجلس يوسف الزوج مكتئبا وهو يبكى على كرسي الصالون وحيدًا.. بينما تدخل زوجته سوسن عليه وهي ترتدى روب النوم.. يبدو عليها أنها نكدية وتتحدث بقرف
سوسن: مالك يايوسف فيه إيه؟
يوسف: مفيش حاجة روحى نامى انت
سوسن: مفيش ازاى؟ دا انت زى الحنفية اللي عايزة جلدة.. وانا من واجبى كزوجة مخلصة انى اسيبك تتفلق.. بس انا هاقل عقلى واقول لك مالك
يوسف: قلتلك مفيش
سوسن: آآآآآه.. طب خلاص ماتعيطش.. الحاجات دى راحت من دماغى خلاص من كام سنة الحمد لله.. على إيدك نسيتها
يوسف: هوه انت مش فى دماغك غير الحاجات دى؟
سوسن: أمال يعنى متجوزاك عشان أكمل بيك الألبوم؟
يوسف: لا ياستى اتطمنى.. مش باعيط على كده
سوسن: وانا اللى فاكراك حسيس.. طب يمكن بتعيط عشان لسة مجالناش ولاد؟ طب دا انا باحمد ربنا.. هوه انا طايقاك عشان اطيق ولادك كمان؟
يوسف: ياستى ولا باعيط عشان الولاد.. اسكتى بقى
سوسن: اسكت ازاى؟ أنا زوجة حنونة.. رقتى مضيعانى..مش هاعرف انام وانت قاعد تعيط هنا؟
يوسف: ليه؟ خايفة عليا؟
سوسن: لا طبعا.. طول ما انت بتعيط هتفضل سايب النور والع.. وانا مش باعرف انام فى النور
يشد يوسف فى شعره
يوسف: ياناس.. ياعالم.. ارحمينى بقى
سوسن: ربنا اللى بيرحم ياحبيبى.. قادر يخسفك ف ثانية وانت قاعد معايا
يوسف: طيب ياستى ادخلي نامى وسيبينى عشان ربنا يخسفنى وترتاحى
سوسن: أسيبك ازاي وانت بتتخسف؟ أمال مين اللى هيصورك ساعتها وينزلها ع اليوتيوب؟
يوسف: ياربي
سوسن: خلاص خلاص.. طب قوللى بس بتعيط ليه؟ يمكن عشان سعر الزيت والسكر غلى؟ طب وانت فارق معاك حاجة.. دانت واكل شارب لابس من فلوس بابا.. دا هما فى العيلة بيبحثوا دلوقتى  شرعية جوازنا من بعض.. باعتبار ان بابا اتبناك
يوسف: ياستى ولا باعيط على الأسعار.. سيبينى دلوقتى ونامى
سوسن: أمال بتعيط ليه بقى؟ بتطرّى خدك؟ وإيه اللى يخليك تقوم الفجر بالذات تعيط؟ ثوابه أكتر يعنى الساعادى؟ 
يوسف: لازم يعنى تعرفى؟
سوسن: أيوة لازم
يوسف: فاكره قبل الجواز لما كنا قاعدين فى الجنينة مع بعض وباباكي الظابط قفشنا
سوسن: أيوة طبعا فاكره.. لما خلاك تمثل أبو سويلم فى فيلم الارض
يوسف: فاكره باباك قال لى إيه؟
سوسن: هددك بالمسدس وقال لك لو ما اتجوزتهاش هاسجنك عشر سنين
ينفجر يوسف باكيا 
يوسف: لو دخلت السجن كان زمانى طلعت النهاردة!

التعليقات