تداول آلاف المتابعين  لموقع التواصل الاجتماعي " فيس بوك"، باهتمام كبير تعليقات عدد من أبرز الشخصيات المصرية على طلاق النجم الأمريكي براد بيت والنجمة الشهيرة أنجلينا جولي.

وعلى خلفية بدء إجراءات الطلاق، قامت قناة "فوكس نيوز" باستطلاع آراءهم، حول تداعيات قرار الطلاق ورؤيتهم للحل، و كانت تصريحاتهم كالتالي:

المعزول محمد مرسي:

الحقيقة إن فيه ناس كلموني في السجن على الموبايل،  حاكم أنا عندي موبايل صغير كده نوكيا، و قالولي على اللي حصل، و أنا شايف إن فيه صوابع بتلعب في الموضوع، وفيه احتمال يكون براد (درنك)، وانتم عارفين أن الـ alcohol وال divorce، دونت ميكس، و أنا باحذر براد بيت، إن انجلينا غير قابلة للانضغاط، حتى و لو كانت على منحدر الصعود.

المستشار مرتضي منصور:

أنا جالي براد بيه المحترم، ووكلني في القضية، وأنا بأقول للولية اللي اسمها انجلينا، وحياة أمك هاجيبك بلبوص، ومش هاسيب حق براد، ولازم تبقي فاهمة، أنا عارف كويس كنتي بتروحي المخيمات ليه وعشان إيه، تحترمي نفسك بدل ما أطلعلك سيديهاتك كلها.

الدكتور محمد البرادعي:

أنا حزين يا مني، لأن ده اللي أنا حذرت منه قبل كده، وقلت إن العنف من جانب براد، حيولد عنف أكتر من جانب أنجلينا، لا بد من التحاور بمشاركة كل الأطراف، بما فيهم جنيفر أنيستون و ماريون كليفورد كمان.

الدكتور توفيق عكاشة:

أني عندي استعداد أحل الموضوع ببساطة، هأعزم الوله براد والبت أنجلينا عندنا في البلد، وأمي تعملنا دكرين بط، ناكل و ننبسط و نقعد ونحل.

د. عبد المنعم أبو الفتوح:

أنا مع براد بيت بكل قوة وأدعم موقفه، ولن أتركه وحيدا، و في نفس الوقت أنا اقف في نفس الخندق مع أنجلينا، و الشرعية للميدان.

الشيخ حازم صلاح أبو إسماعيل:

 أنا سعيد جدا إنك سألتيني السؤال ده، أنا الحقيقة باناشد الأخ مراد بت واختنا الحاجة أمينة جولي، بأنهم ينضموا لينا، و يساعدونا بالمال والسلاح عشان نقدر نحاصر مدينة الانتاج الإعلامي الأمريكية ونمنع الإعلاميين هناك تنشر أخبارهم، وده أكبر دليل على إن الحاجة نوال أمي مش أمريكانية، لأن مش معقول هاحاصر مدينة إنتاج أمي.

الدكتور عمرو حمزاوي:

 في الواقع هناك التباس ميتافيزيقي في موقف كل من الطرفين براد وأنجلينا، وده نابع من الخلاف الأيديولوجي المنبثق من رغبة الطرفين في فرض رؤى ومعطيات لا تتوافق إطلاقا مع الرغبة في تحقيق أية تفاهمات، وترتيبات لوجستية علي الأرض، بما يحقق العدالة الناجزة لكل الأطراف الفاعلة، وغير الفاعلة، خاصة جنيفر أنيستون، لأن بسمة بتحبها.

الأستاذ حمدين صباحي:

 أنا باطالب المجتمع الدولي بالتدخل، أصل من غير المقبول إن براد بيت يفضل يتنقل من جنيفر لانجلينا لماريون، يبقي الحل تداول الموزز، نفتح باب الترشيح وأنزل ضد براد وتاريخي النضالي يزكيني، بالإضافة إلي إنه معندوش وقت ليهم، أما أنا فاضي، والثورة مستمرة.