بقلم: أنور الوراقي

1-   الزواج من كلبة غير مُكلِّف مادياً على الإطلاق، يعنى لا هتدفع مهر، ولا شبكة، ولا هتعمل حفلة تكلفك دم قلبك، كُل المطلوب منك شوية عضم، ومُمكن طوق جلد كمان لو كُنت حاببها أوى!

2-   الزواج من كلبة غير مُكلِّف معنوياً على الإطلاق، يعنى محدش هيقول لَك إنت ابن مين، ومعاك شهادات إيه، وإنت مستواك مش من مستوانا!

3-   بالتأكيد هى زيجة مفيهاش أى نكد، ولا خناقات، ولا لوية بوز والعبارة الشهيرة "لو إنت مُهتم كنت عرفت"، طبعاً كمان مفيش قمصة بسبب رجوعك متأخر وكُنت فين ومع مين؛ لأنها ببساطة لو عايزة تعرف مكانك هتعرفه لوحدها بعد ما تشمشم عليك وتجيبك من تحت طقاطيق الأرض!

4-   مفيش حما تطلع عينك بالنكد والتحريض عليك، وتسليط مراتك على تنغيص عيشتك، وطبعاً كمان مفيش هدايا كُل شوية لعيد الميلاد، وعيد الأم، وعيد تحرير إثيوبيا، وساعة ما تتزنق فى هدية أوى هُما برضو شوية عضم!

5-   موضوع الشوبنج دة هتنساه خالص، لا جرى على المحلات، ولا لطعة قدام الفتارين بالساعات، ولا تشترى وترجَّع، وتشترى وترجَّع، وتشترى وترجَّع!

6-   لما تيجى تنام هاتبق مرتاح خالص، ومش خايف على ممتلكاتك ولا فلوسك لو عندك فلوس، أكيد لأن البيت عليه حراسة كويسة، بما إن المدام متدربة على كدة يعنى!

7-   لاحظ كمان إن هى نفسك مش هتقلِّب فى جيوبك، ومش هتخنصر حاجة من المحفظة من ورا ضهرك؛ لأنها مش هتعرف تصرف الفلوس!

8-   لو إنت ماشى مع مراتك وحد عاكسها هتتخانق معاه، مُمكن تضرب ومُمكن تنضرب، لكن لو ماشى مع الكلبة واتعاكست، هى اللى هاتتخانق وتجيب حقها وحقك، على ما تكون ولَّعت لك سيجارة وروقت دماغك!

9-   لو اختلفتم وأصبحت الحياة بينكم مستحيلة، عُمرها ما هترفع عليك قضية خلع، ولا تبهدلك فى المحاكم بنفقة ومؤخر وقايمة، وبالعكس لو إنت مش عايزها، خلاص هترميها فى الشارع وملهاش ديَّة!

10- بالنسبة للأولاد، فبرضو مش هيكلفوك حاجة، ديّتها شوية عضم وخلاص، ومفيش مصاريف علب لبن صناعى من أم 100 جنيه العلبة، ولا كُل يوم عبوة بامبرز بـ200 جنيه، ولا الهَم دة، لاحظ إنهم هايبقوا ماشيين فى المجال دة على طريقة "مطرح ما ترسى دُق لها"، فى الشارع، جنب أى جدار، مش هتفرق!