بقلم: أنور الوراقي

(1) عدد حوادث الوفاة الناتجة عن الفسيخ المُسمَم تضاعفت فى السنوات الأخيرة بالذات، بسبب ضعف الرقابة مُقابل توحُّش جشع التُجار، وإقبال الناس المُتزايد على شراء الفسيخ، تضاعفت هذه الحوادث أكثر من 5 مرَّات، يعنى مُمكن تكون من اللى عليهم الدور السنة دى، وبالتالى لازم تكتب وصيّتك وتسدد ديونك قبل أكل الفسيخ، مُمكن تحتفظ بحياتك وتتجنب الخطر، وترفع شعار بلاها فسيخ وخلاص!

(2) لازم تشترى الفسيخ من مكان ثقة، وتستخدم كمية مهولة من الملح والليمون والخل لغسيله، معلش ضحى شوية، هو آه كيلو الفسيخ عدَّى 200 جنيه، وكيلو الليمون وصل 50 جنيه، لكن العُمر مش بعزقة، قد تدفع كُل هذا وتنجو، وقد تدفعه وتموت برضو، فعقلك فى راسك، إنت حُر، مُمكن توفَّر فلوسَك وتَعَبَك وتعيش، وبلاها فسيخ!

(3) أكيد بعد ما تاخُد غرضَك من الفسيخ، وتصرف دم قلبك على البنود السابقة، وتيجى تنام ومتعرفش تنام من التعب والإرهاق والحموضة، والريحة اللى مش عايزة تطلع، حتى بعد ما اشتريت بـ100 جنيه صابون، وخلَّصت كُل البارفان والروايح ومعطرات الجَو اللى عندَك، وسببت أزمة عالمية فى معجون الأسنان، هاتبدأ تندم، وتسأل الليلة السودا هتعدى إزاى من غير غسيل معدة؟ طيب الشهر هيعدى إزاى بعد المصاريف دى كُلها؟ وقتها هتندم وتقول كان بلاها فسيخ، طيب ما إحنا لسَّة فيها يا عم!

(4) متحاولش تعزم حَد على أكلة فسيخ أبداً، وقتها دة مُمكن يكون شروع فى قتل، ومُمكن إنت تستحمل وهو ميستحملش ويروح فطيس، وتحتاس فى الجُثة، تدفنها فى الجنينة، واللا تحطها فى التلاجة، طبعاً هاتيجى رجليك فى التحقيقات، وتغرق فى سين وجيم، ومُمكن تتسجن أو تتعدم بسبب فسيخة، على إيه كُل دة؟ ما بلاها فسيخ أحسن!

(5) لو الدُنيا مشيت معاك تمام، وعدَّى اليوم على خير بعد أكل الفسيخ، فهذه ليست نهاية التجربة، لاحظ إن دة هيشجعك على أكل الفسيخ أكتر السنة الجاية، ومُمكن تتجرَّأ وتعزم ناس عليه كمان، وقتها هتكون احتمالية الخطر أكبر "جشع التجار زاد والرقابة قلت أكتر وأكتر فالنسبة المُعرَّضة للهلاك تتضاعف"، وبالتالى مُمكن تحصل عملية إبادة جماعية ليك ولأصدقائك اللى عزمتهم على الفسيخ، إذاً هى مسألة وقت، والخطر مش هيسيبك، طيب ليه؟ ما بلاها فسيخ أحسن زى ما اتفقنا!