كيف تعرف أنك أصبحت حسام حسن؟ "5 علامات خطيرة"!

 

بقلم: أنور الوراقي

1- أنت أفضل من الجميع، كُلهم فاشلين، أو ناجحين على الحرُكرُك، لكن إنت الفلتة الوحيدة، لو قضوا عُمرهم كُله من أجل تحقيق نصف نجاحك لن يفلحوا، هُما فين وإنت فين، دة إنت (حساااام حسسن) اللى كان بينيِّم العالم من المغرب قبل (توماس أديسون) الله يحرقه ما يخترع اللمبة عنداً فيك وحقداً عليك!

2- لأنك الأفضل فالجميع مُتآمر ضدك، من ينتقدك فهو عدو جاهل ناكر للجميل، من يساندك فهو فاهم وعبقرى، وعارف قيمتك، لكنه سيتآمر عليك بعدين برضو، لذلك متآمنلوش أوى، لأنه سيتحوَّل بقدرة قادر فجأة عند أول علامة اعتراض لعدو زنديق قذر خائن يستحق ضرب القديمة!

3- أنت دائماً مظلوم، رغم عطائك الكبير والغزير، لكنهم ظلموك، ظلموك من يوم ما اتكتب اسمك فى مكتب الصحة فى شهادة الميلاد (حسام) بدل (عصام)، أو (عبيد) بدل (وليد)، لحد النهاردة لسَّة بيظلموك، رغم إنك قدمت لهم أكثر من الكثير بكثير، تقول إيه؟ ناس جاحدة وطبعاً إنت أحسن منهم!

4- من حقك الاعتداء على أى شخص لفظياً، أو جسدياً، لو قاوم فهو الغلطان، لو استسلم فهذا أبسط واجب مُمكن يقدّمه لواحد فى عطاءك وتاريخك، لولاك ما كان هو الآن طبيب أو لاعيب أو صحفى أو مصوِّر أو سبَّاك، وبالتالى لازم لما تضربه يقول لَك هات كمان يا كابتن (حسام)، ولازم يضحك وهو بينضرب؛ لأنه مش من حقه حتى يكشَّر فى وشَّك!

5- اجعل الحماس دائماً سيد الأشياء، أنت مُتحمِّس بشكل غير طبيعى، حماسك يؤهلك طوال الوقت لتكون سيدهم وتاج راسهم، لو لعبت تنس تهزم (فيدرر) بصوابع رجليك الشمال، ولو دخلت سباق عربيات يبقى (مايكل شوماخر) جنبك سلحفاة، لو فكَّرت فى الشطرنج فلازم (كارلسن) يموت بحسرته فى مواجهتك، لو قرر يعيش هو أو الطابية بتاعته يبقى بِجِح وميعرفش تاريخك طبعاً، أما لو قررت تكون مُمثل فالست (أمينة رزق) بالنسبة لك مُجرَّد نُسخة سخيفة من (الخليل كوميدى)!

التعليقات