بالفيديو: عن "بصّة" البدرى لمحمود عاشور.. "10 أشخاص يستاهلوا نفس البصَّة"!

 

بقلم: أنور الوراقي

1-   الزوج المسكين المغلوب على أمره، والندمان على اليوم الأسود اللى اتجوِّز فيه، لو قابل بالصدفة فى أى مكان المأذون اللى كتب له كتابه، طبيعى يبُص له البصَّة دى!

2-   الموظف الغلبان آخر الشهر وهو بيتفرَّج على اللحمة، وييجى الجزار يقول له طلباتك، يقوم الأول واخد بعضه وماشى.. طبعاً البصَّة بتكون من الجزار للمواطن المسكين!

3-      أى ست خلقها ربنا لازم بتبُص البصَّة دى لأى ست تانية أصغر وأحلى منها!

4-   مُديرَك لما يشيِّلَك شُغل أكتر من طاقتك، وتستحمل وتاخُد على دماغَك، وفى الآخر ميعجبوش ويهزأك قُدَّام زمايلك، طبعاً إنت بتبُص له البصَّة دى، لكن من ضهرُه أكيد!

5-   لما نكون فى عِز الحَر والصيف والشمس والتلزيق، وتقوم شايف بوست قديم ليك كتبته فى عِز الشتا والتلج، وإنت بتقول "إمتى الصيف ييجى بقى؟".. ساعتها بتبُص البصَّة دى لنفسَك فى المراية، واحتمال يكون وراها تفَّة كمان!

6-   طبعاً البصَّة دى من نصيب كُل سواقين التوكتوك والميكروباص، واللى ماشيين بالموتوسيكلات فوق الرصيف، واللى مشغلين أغانى المهرجانات بصوت عالى فى المحلات اللى تحت بيتكم!

7-   دى طبعاً نفس بصَّة بتاع الباركينج العشوائى لما يصطاد زبون سُقع بعربية آخر موديل، ويقعد يلمَّع له فيها ـ وهى أصلاً نضيفة ـ وهو فاكره شاب سيس هيديله ألف دولار، فطبعاً لما بياخُد الخمسة جنيه بخلع الضرس طبيعى يبُص البصَّة دى!

8-      البصَّة دى بتبُصها الست للبياع اللى رفض يرجَّع لها حاجة اشترتها، مع إنها يادوب عاشر مرَّة ترجعها!

9-   بصِّتك لموبايلك لما يفصل شحن فى وقت مفيش مصدر كهربا قريب منك، ولا معاك شاحن، وإنت مستنى مُكالمة مُهمة جداً!

10- لما مراتَك تطلُب منك بامبرز لابنك، وإنت لسَّة شارى عبوة بـ200 جنيه من أقل من أسبوع.. هنا بتكون البصَّة خلفية مزدوجة ليها وللطفل سوا!

نظرات حسام البدرى الاشمئزازيه للحكم محمود عاشور والتى استحق عليها الطرد HD

التعليقات