تجلس المعلمة صاحبة محل الفاكهة تدخن الشيشة وبجوارها الصبى.. بينما يقف موظف يمسك الجورنال تحت إبطه وبيده فواتير وينظر لأنواع الفاكهة بلهفة وهيام

المعلمة: واد يا بلحة.. الراجل ده واقف كده ليه زى النخلة اللى انت جاى منها؟
بلحة: والله مش عارف يامعلمة.. من ييجى ساعة وهوه واقف قدام الفاكهة
المعلمة: شكله موظف.. يمكن يبقى بتاع الضرايب وكمان معاه فواتير.. يالهوى دا احنا مزودين الاسعار
تقف لترحب به فى افتعال
المعلمة: اتفضل يا أستاذ.. اتفضل
الموظف: يزيد فضلك.. أنا بالقى نظرة بس.. حاولت اغض البصر بس مقدرتش لما شفت التفاح
تجلسه على كرسيها
المعلمة: طب ده انت منورنا.. ثوانى وانا اجيب لك قفص تفاح لحد عندك
الموظف: لا حد الله.. انا واعد العيال ومراتى اننا ماناكلهاش خالص.. عشان ناكلها فى الجنة إن شاء الله
المعلمة: دا احنا نجيب لك التفاح والأناناس والموز لحد عندك..
الموظف: شكلك طيبة يامعلمة.. طب ممكن اعرف لو مفيهاش إساءة أدب منى سعر ربع كيلو التفاح كام؟
المعلمة: كيلو التفاح عشانك انت باتنين جنيه.. وعشان القعدة الحلوة دى بجنيه واحد.. وعشان خاطر الواد بلحة بنص جنيه
يشير للجورنال فى يده
الموظف: طب وعشان خاطر الجورنال؟
المعلمة: يوصلك لحد البيت يا أستاذنا.. واد يابلحة قفص تفاح للاستاذ.. بس انت برضه يا استاذ ظبطنا فى الفواتير
يشير للفواتير معه
الموظف: أظبط إيه؟ دى فواتير اقساط التلاجة والغسالة
المعلمة: تلاجة وغسالة إيه؟ هوه حضرتك الأستاذ عمر افندى؟
الموظف: عمر افندى إيه بس؟ انا راجل موظف على قدى فى مصلحة البريد
المعلمة: يعنى انت مش من الضرايب؟
الموظف: ياريت.. أنا بادفع ضرايب انما ماخدهاش
توقفه وتجلس هى على كرسيها فى عنطزة
المعلمة: سك على التفاح ياواد يابلحة.. وعامل لى فيها رئيس مصلحة الضرايب وقاعد تشمشم على الفاكهة
الموظف: أصل بصراحة كنت عايز أجيب كيلو تفاح لواحد صاحبى موظف تعبان
المعلمة: كيلو التفاح بعشرين جنيه
الموظف: هوه مش تعبان قوى بصراحة.. دى كحة بس.. بس مش انت قلتى ان الكيلو باتنين جنيه؟
المعلمة: أيوة.. ده التفاح العادى.. إنما التفاح المسرطن بعشرين جنيه
الموظف: طب ممكن آخد قفص تفاح أسرطنه أنا بمعرفتى؟