بشرى لكل حامل مقبلة على الولادة!
Wednesday, January 4, 2017 - 11:10
كتب:
يجلس الموظف فى قمة الكسل فى استقبال المستشفى وهو يلعب سودوكو.. يدخل فجأة عليه محمود ومعه زوجته تصرخ من وجع الحمل
محمود: معلش ياحبيبتى.. معلش.. خلاص وصلنا المستشفى اهو
يستوقفهما الموظف الذى يتكلم بطريقة بطيئة جدا
الموظف: استنى استنى.. رايح فين انت وهيه؟
محمود: المدام تعبانة قوى
الموظف: طيب استنوا .. هيه وكالة من غير بواب.. مش فيه واحد بيظبط الأمن والأمان هنا؟
يفتح الدفتر فى بطء
الموظف: س: الست تعبانة عندها ايه؟
يتعالى صراخ سلوى وهى تشير له إلى بطنها فى غيظ
محمود: عايزة تولد
الموظف: مما سبق يتضح ان المدام حامل أصلا.. أصل عقبال أملتك أنا افهمها وهيه طايرة.. بالك انت انا لسة حالل السودوكو دلوقتى والمستوى الرابع كمان
يتعالى صراخ سلوى
محمود: ياعم ابوس ايدك خلصنا
الموظف: طيب المدام عايزة تولد طبيعى وللا قيصرى؟
محمود: ياعم.. الدكتور هوه اللى بيحدد مش احنا يعنى؟
الموظف: ازاى الكلام ده؟ احنا هنا مستشفى استثمارى محترم.. تحت أمر الزبون.. لو عايزين نستلقف الواد طبيعى ماشى.. لو عايزين نشُقّ نشُقّ
تبكى سلوى رعبا أكثر
محمود: ياعم نشُقَ ايه؟ هيه بطيخة ع المكسر؟ ياعم بسرعة الست هتولد وهيه واقفة
الموظف: طب خليها تحاسب وتمسك نفسها.. عشان لو ولدت وهيه واقفة برضه هتدفع فلوس عشان هيه ولدت داخل حرم المستشفى
محمود: هوه الحرم الجامعى؟
الموظف: مطلوب عَشَر تلاف جنيه مقدم
تصرخ سلوى أكثر
محمود: عَشًر تلاف جنيه مقدم؟ ليه؟ تشقوا بطنها بعشر تلاف جنيه؟
تصرخ سلوى
محمود: آآآ.. اقصد تولدوها بعشر تلاف جنيه؟
الموظف: والله ده اللى عندنا يا استاذ ولازم تدفع دلوقتى قبل ما نشُقّ
محود: طب معلش ممكن تدخلوها بس وتولد وانا هاجيب الفلوس
الموظف: عشان بعد ما تولد ما ترضاش تدفع وتروح لجرايد المعارضة..لاااا.. الفلوس أولا
محمود يسند زوجته على رجله ليخرج موبايله من جيبه
محمود: ده الموبايل بتاعى.. خليه معاك وانا هاروح اجيب لك فلوس بس المدام تدخل
ياخذ منه الموبايل ويفحصه
الموظف: ماشى مقبول.. بس ده (4G)؟
محمود: ياعم أيوة.. خلصنى بقى المدام تعبانة قوى
يخرج الموظف شنطة كاملة مليئة بالموبايلات والساعات ويضع موبايل محمود فيها
الموظف: ماشى روح انت جيب بقية الفلوس
يخرج محمود جريا فينادى عليه الموظف
الموظف: استنى.. ماتنساش تجيب الشاحن والضمان وانت جاى.. جايز الظروف تحكم
محمود: ماشى
الموظف: وماتنساش كمان تجيب خمسين جنيه زيادة
محمود: ودى بتاعة ايه؟
الموظف: دى تمن الفوطة اللى الدكتور هينساها فى بطن مراتك طبعا!
التعليقات