تجلس أمينة الأم على الكرسى وأمامها المنتج لمعى بيه وبجواره ميمى ابنها

لمعى: وزى ما قلت لحضرتك يا أمينة هانم.. أنا أول ما شفت ابنك ميمى قلت لازم آجى اتعاقد معاه عشان يعمل ألبوم مع الشركة بتاعتى
أمينة: واللى يجمع الألبوم هياخد جوايز؟
لمعى: لا يا أمينة هانم.. مش قصدى.. أنا قصدى ألبوم غنا.. شريط يعنى
أمينة: شريط؟ ده ما ينفعش غير بدل شريط منع الحمل.. دى أخته سمعت صوته جالها تشوه فى الجنين
لمعى: ياهانم انت مش حاسة بالجوهرة اللى معاك.. وبعدين احنا مالنا بصوته؟ احنا عايزينه يبقى مطرب ونجم مش مشكلة الصوت
أمينة: هتعمل شريط صم وبكم يعنى؟
لمعى: أهم حاجة ياهانم اننا نتطمن على مقومات النجاح
يشير لشعر ميمى السبايكى
لمعى: ده
ويكشف شعر صدره الغزير بمبالغة
لمعى: وده
لمعى: كده يبقى احنا هنصعد للعالمية
أمينة: لو النجومية بالشعر ياخويا كان زمان أبوه الله يرحمه بقى فشر عبد الوهاب .. ده كان شمبانزى من كتر الشعر
لمعى: صدقينى ياهانم أنا هاخللى ابنك ميجا ستار
أمينة: أيوة جولدستار عارفاها.. ماركة تلاجات محترمة.. وواسعة وببابين
لمعى: لو ممكن بس تمضى على عقد الاحتكار ده
أمينة: احتكار ليه؟ هوه حديد وللا أسمنت؟ وبعدين اتطمن مفيش حد هيتطس ف نظره غيرك ويمضى معاه
ميمى: ياماما ماتقوليش كده.. ده انا غنايا كله حساسية
أمينة: أمال احنا فى البيت بنهرش من شوية؟
لمعى: ياهانم صدقينى انت بس لاحظى صوت ميمى هتعجبك جدا البحة اللى صوته
أمينة: دى بحة الجوع حضرتك.. هوه لما بيجوع بينوح زى الديابة
لمعى: احنا عايزين نعبى الشريط.. الصوت مش مهم دلوقتى.. وشوفى مين اللى بيغنى دلوقتى هتلاقيهم ميمى وأمثاله.. الوسط كله بقى شعر حضرتك
أمينة: دول مش محتاجين جمهور.. دول محتاجين حلاق.. ياخدهم كلهم بالمكنة.. وبعدين يستحموا.. كده الوسط ينضف.. ده وسط قشرة بعيد عنك.. وانت بقى ياخويا شفت ابنى فى حفلة الجامعة بتاعة الغنا يعنى؟
لمعى: لا ياهانم.. وهيه الحفلات دى بتطلع موهوبين؟ أنا باروح أماكن تانية أكتشف فيها الأماكن الحقيقية
أمينة: وشفته فين بقى؟
لمعى: عند الأسطى فهمى الحلاق.. أنا أشوف الموهبة من دول وهيه منتشرة فى الصدر والشعر وف كل مكان.. أشقطه علطول
أمينة: وأكيد بتدى فهمى الحلاق سبوبته؟
لمعى: وأديله ليه؟ ماهو شريكى.. وهوه اللى هيلحَّن الألبوم