الدليل العصري للزوج المصري!

تجلس الأم مع ابنتها سلمى المشغولة فى تقشير البطاطس
سلمى: بس ياماما.. ومن ساعة المسلسل بتاع مهند ونور ده.. وبسلامته كل شوية قرفان ويقول لى نفسى اشوفك زى نور.. تحبينى كده وتخافى عليا
الأم: وقلتيله إيه؟
سلمى: قلت له عيشنى ف قصر ع البحر زى الدلعدى نور وانا اعرق لك حب وحنان
الأم: إجواز آخر زمن.. ده ناقص يقول لك (ياحبيبتى) زى الأفلام
سلمى: وهوه يقدر؟ هوه عارف من قبل الجواز انى مش بتاع مسخرة وكلام فاضى.. ده من يومين بيقول لى عايزين نتفسح ع الكورنيش شوية؟
الأم: يالهوى.. وانت سكتيله؟
سلمى: أبدا.. زعقت وقلت له: انت فاكرنى خطيبتك اللى تقف معاها على كوبرى قصر النيل وتلفحها تحت إيدك عشان مايشوفهاش أمين الشرطة؟
الأم: رجالة عنيها يتدب فيهم رصاصة.. وبعدين يعنى مش لما هوه يبقى مهند تبقى انت نور.. ده شبه البورص بعد ما يتضرب بالشبشب
سلمى: ومش كده وبس.. معدش راضى عن أى حاجة باعملها.. تعرفى من يومين عملت له أحلى مكرونة من اللى كنت باعملهالك بإيدى قبل الجواز
تتحدث الأم بقرف شديد: عارفاها
سلمى: بسلامته ماكلهاش ورماها للكلب
الأم: طب والكلب ذنبه إيه بس يابنتى؟
سلمى: وكمان بيقول لى عايز حنان ومعاملة حلوة.. ناكر الجميل.. تعرفى ياماما.. من أكتر من أسبوع وانا بانده له بإسمه من غير شتيمة
الأم: أصيلة يابنتى.. وقادرة تعيشى؟
سلمى: كل شوية أقول يمكن يغلط واشتمه وارتاح.. بس ماشى ع الجدول.. ده امبارح استأذن منى عشان راح شرب من التلاجة فى غير مواعيد الشرب
الأم: ماهى بتبدأ بشربة مية من التلاجة وبعدين بعيد عنك تلاقيه خد عليها وبقى بيدخل الحمام زيك زيه.. ويتكلم فى التليفون من غير إذن
سلمى: فشر.. وانا هسكت له؟
الأم: ما تتصلى بيه فى الشغل كده عشان ييجى بسرعة.. عايزة اشتمه قبل ما امشى
تتناول سلمى التليفون سلمى عنيا ياست الكل.. دى طاعة الأم واجبة
تتحدث فى التليفون
سلمى: أيوة يا سى محسن.. القرد اللى بيشتغل جنبك راح فين؟ لا ياسيدى مش لطفى.. ولا فتحى.. انا عارفة انكم كلكم قرود.. انا قصدى متولى.. إيه؟ خرج من بدرى عشان كان تعبان؟
تغلق السماعة
الأم: اتفضلى.. بيقولوا تعبان. زمانه اتجوز عليكِ وراح لمراته التانية
سلمى: فال الله ولا فالك ياماما.. تلاقيها عربية دهسته بس، إنما جواز تانى إيه.. قشّرى قشّرى

التعليقات