وفاء غريب لزوجة مصرية!

تجلس وفاء فى الصالون متشحة بالسواد وحولها بعض النسوة فى سواد أيضا فى عزاء زوج وفاء، وعلى الجانب الآخر يجلس بعض الرجال يشربون القهوة.. سعاد تبكى فى عنف والنسوة تهدئها 

وفاء: ياحبيبى ياللى فتنى بدرى ياخويا
معزية: خلاص بقى ياختى.. الراجل مات من أكتر من ساعتين.. انت هتضيعى عمرك كله على اللى راح؟.. الحى أبقى من الميت
وفاء: يا سايبنى وانا ف عز شبابى ياخويا
معزية:  أى والله ياختى ده اللى يشوفك يديك 30 سنة بس
تتوقف وفاء فجأة عن البكاء وتجيبها فى صرامة
وفاء: 28 بس ياختى.. أجيبلك الشهادة من جوة؟
تهدئها المعزية فتصرخ وفاء مرة أخرى
وفاء: آآآآآه ياللى فايتنى فى الدنيا لوحدى.. من غير حتى شاليه فى مارينا ياواطى
معزية: هوه مات من إيه ياختى؟ ماحنا سامعين صوتك وانت بتزعقيله وبتبهدليه زى كل يوم وهوه زى الفل.. إيه اللى جرى؟
وفاء: أنا عارفة ياختى؟.. الرجالة معدوش بيستحملوا.. رجالة صينى.. طب ده انا أمى عاشت مع ابويا اكتر من خمسين سنة.. كلهم خناق ونكد زى الفل والراجل ولا اشتكى
معزية: ولا يهمك ياختى.. هيه مامتك فين؟
وفاء: مامتى؟ مامتى مش مصدقة الصدمة.. قاعدة تقول مين هيغسل لى المواعين تانى ويكنس لى صالة الشقة ياجوز بنتى ياحبيبى
معزية: الله يكون فى عونها.. دى الواحدة مابتصدق تلاقى جوز بنت مرمطون دلوقتى
معزية أخرى: معلش ياحبيبتى.. بكرة ربنا يعوضكم.. وتتجوزى تانى
وفاء: تانى.. أبدا.. أنا جربت حظى.. عمرى ما اخون جوزى حبيبى أبدا.. عمر ما حد أبدا ينام على فرشته غير ماما
تتشحتف أكثر بينما يتحدث سعيد وعادل لبعضهما وهما ينظران لها
سعيد: طيبة قوى مرات المرحوم
عادل: آه وحلوة قوى كمان
سعيد: ياأخى حرام عليك.. الراجل لسة ميت
عادل: وده هيأثر فى حلاوتها؟
سعيد: يا أخى افهم وراعى الموقف.. وبعدين دى شكلها بتحبه قوى ومخلصة له جدا
عادل: ياحبيبى كلهم كده فى الاول وبعدين عند أول سمكرى سيارات معدى عايز يتجوز بيوافقوا
سعيد: لا لا لا .. أبدا.. انت مش شايف؟ دى متشحتفة عليه خالص
عادل: تراهن انى أعلقهالك واحنا قاعدين هنا
سعيد: يابنى تعلقها إيه؟ هيه واقفة على عمود فى جامعة الدول؟.. ده احنا ف عزا جوزها.. والست وفية جدا
وفاء: اسكتوا.. ولا عمرى اتجوز بعد جوزى أبدا. آآآآآآآآه
عادل: طب بس اسمع كلامى وشوف انا هاعمل إيه؟
يعلو صوته فجأة وكأنه يتحدث لسعيد بصوت عال:
عادل: جميلة قوى مرات المرحوم ياد يا سعيد.. لو اعرف بيت أبوها بس كنت طلبتها منه للجواز علطول.. بس شكلها وفية لجوزها
وفاء: آآآآآه ياجوزى ياحبيبى.. ياللى اتجوزتنى من بيت أبويا اللى ف دار السلام شارع الترعة العمارة خمستاشر ياخويا!
 

التعليقات