بقلم: أنور الوراقي

1- اتكلمى عن نفسك شوية، هاه؟ لقيتى حاجة تقوليها؟ طيب اتكلمى شوية كمان.. إيه الأخبار؟ لسَّة فيه حاجات مُمكن تتقال، طيب اتكلمى تانى، إيه؟ الكلام خلص؟ مش مُشكلة، عيدى اللى قولتيه فى الأول يمكن حد مأخدش باله، أو لسَّة فاتح التليفزيون حالاً، فأكيد لازم يعرف سيرتِك الذاتية، ويحفظها كويس!

2- اعملى حلقة عن العفاريت، وهاتى ناس راكبها عفاريت، وشيوخ يطلَّعوا العفاريت، وهاجمى الناس اللى بتهاجم موضوع العفاريت، واتكلمى تانى عن العفاريت، واعملى سلسلة حلقات عن العفاريت!

3- اتخانقى مع الضيوف، واستضيفى ضيوف بطباع غريبة وواجهيهم بعكس معتقداتهم علشان الحلقة تسخن، مثلاً هاتى واحدة مُلحدة وبتعلن إنها مُلحدة، وقوليلها صلى بينا على رسول الله، ولما ترفُض قوليلها إنتى كافرة واطرديها على الهواء مُباشرةً، على أساس إنك كنتى مستضيفاها وهى بتقول على نفسها إنها من العشرة المُبشرات بالجنة مثلاً!

4- اعرضى أشلاء مقطوعة، وجثث محروقة، ودم على الأرض والحيطان، واتكلمى عنهم، واعرضيهم تانى، واشرحى وشرَّحى فيهم، وامشى على الدم، وامسكى دراع أو رجل مقطوعة وشاورى بيها للمُشاهدين علشان يتفرَّجوا كويس، أو اعمليها عُكاز!

5- متخليش الناس تنسى موضوع العفاريت، استضيفى حد عليه عفريت تانى، واتكلمى عن الجان، وخلى عفريت يعمل مُداخلة فى التليفون، وحاولى تحضَّرى عفاريت على الهوا كمان!

7- وجهى للضيوف أسئلة مُتميزة باستمرار، استضيفى مثلاً والدة قاتل، واسأليها: إنتى زعلانة على ابنك؟ كنتى بتتمنى إنه يعيش؟ طيب إنتى زعلانة واللا حزينة؟ هل كُنتى بتحبيه؟ بتحبيه قد إيه؟ إيه رأيك فى اللى قتله؟ كان نفسك يسيبه عايش؟ إيه شعورك لما ابنك يتقتل؟ طيب إنتى بتعيطى ليه؟!

8- اتكلمى ببطء شديد، وعيدى وزيدى فى الكلام، وكُل جملة عيديها 3 أو 4 مرَّات بترتيب مُختلف، يعنى مثلاً قولى إحنا روحنا المشرحة وشوفنا العفريت، وبعدين قولى إحنا شوفنا العفريت لما روحنا المشرحة، وبعدين قولى همممم إييييه.. وإحنا فى المشرحة لما روحناها شوفنا العفريت فيها.. وهكذا.. أصل الحلقة طويلة ومش هينفع نسيبها فاضية أو نسكُت!

9- لما حَد يهاجمِك خليكى دايماً مُترفعة عن الصغائر، قولى على الهوا إنه بيهاجمك، وفسَّرى موقفِك، ودافعى عن نفسِك، وقولى سيرتك الذاتية تانى، واشتميه، واتكلمى كتير عن الموضوع، واكشفى كُل الحقائق من وجهة نظرِك، واسرديها بالتفصل المُمل، وفى الآخر قولى أنا مش هرُد عليه!

10- جرَّبى كُل حاجة على نفسِك، يعنى لو ناس بتتعالج بقَرص النحل خلى النحل يقرُصك، لو ناس بتاخُد حُقن هوا، خُدى زيهم، لو ناس عليها عفريت، خلى عليكى عفريت إنتى كمان!

عزيزتى.. هل لاحظتى أن رقم (6) غير موجود؟ واضح أن العفاريت قد قامت بإخفاءه على السيرة!