بقلم: أنور الوراقي

فى هذا الموضوع لن نعيد اختراع العجلة.. لكن هنعرَّفك طرق مُختلفة وجديدة لاستخدامها..

1-   طقم كوبايات (3 أو 6 أو 12): هدية اعتيادية، بل أنها الخيار الأول فى هدايا عيد الأم لمُعظم المصريين، أرجوك تاخد حذرك لو اشتريتها من بائع جائل، لا تعتمد على العينة التى يعرضها عليك وتشترى العبوة المقفولة بتراب الفلوس (أصلاً مبقاش فيه حاجة بتراب الفلوس)، وإلا هتلاقى الكوبايات عبارة عن قطع زجاج أو طوب لما الهدية تتفتح، وست الحبايب متستاهلش منَّك كدة!

2-   عباية: هدية اعتيادية برضو، المُهم تراعى المقاس كويس، وحاول تقنع البائع إنك مش بتشتريها هدية لعيد الأم حتى لا يضغط عليك فى السعر مُستغلاً احتياجك لها، طبعاً إنت هتحاول تكدب، وأكيد هو هيفقسك، يعنى فى الآخر هتدفع دَم قلبك، والعباية اللى سعرها 300 جنيه هتشتريها غالباً بـ500 علشان الموسم، الدرس المُستفاد إنك بعد كدة لما تقرر تشترى عباية، لازم تجيبها قبل عيد الأم بست شهور على الأقل، وقتها تستغل حالة الركود عند البياعين، وتجيبها برخص التراب (برضو مفيش حاجة اسمها رخص التراب دلوقتى)، وكمان محدش هياخد باله إنك "هتسقعها" لحد عيد الأم!

3-   شنطة أو جزمة: تقدر تجيب الاتنين لو كُنت مليونير، أو كُنت قدرت تحوِّش قرشين كويسين، منه لله اللى عمل عيد الأم يوم 21 فى الشهر، المفروض كان يعمله يوم 2 أو 3 فى الشهر علشان القبض ميكونش لسَّة طار، مُعظمنا بيشحت أصلاً على يوم 12 فى الشهر، وبناءاً عليه فأكيد مش هتقدر تجيب الاتنين، وجايز متقدرش تجيب أكتر من شبشب زنوبة.. مش مُشكلة، المُهم تحاول!

4-   عِدة الصلاة: مكوَّنة من إسدال وسجادة وسبحة، ولما عيد الأم يتقاطع مع رمضان ياريت تزوِّد معاهم مصحف، أرجوك تخلى السبحة عادية، بلاش السبح اللى بتتلبس فى الصباع وتعد إلكترونى دى علشان مفيهاش بركة، بالمُناسبة أكيد الوالدة عندها سجادة صلاة، ومفيش بيت بيخلو من مصحف، وبالنسبة للسبحة فمُمكن تسبِّح على صوابعها، والإسدال برضو مش ضرورى أوى لأنها تقدر تصلى بأى حاجة عندها.. يعنى مُمكن الهدية دى ترسى على طرحة بعشرين جنيه وخلاص، لأنها هتلبسها فى البيت يعنى.. منه لله اللى عمل عيد الأم فى أواخر الشهر برضو!

5-   كارت شحن بـ200 جنيه: استنى كدة، أرجوك متتخضش أوى، مبدأياً أى هدية مُحترمة مش هيكون سعرها أقل من ضعف المبلغ دة، لكنك هتستفيد جداً من الكارت، يكفى إنك كُل شوية تتصل بوالدتك وتقول لها إنك تعبان، أو مشغول، أو مش لاقى حَد فاتح، وتطلب منها تحوِّل لك شوية رصيد من الكتير دول، يعنى من الآخر مُمكن تتحصَّل على 150 جنيه على الأقل من قيمة الكارت حسب شطارتك، لكن إوعى حظك الزفت يخليك متاخدش بالك إن شركة الاتصالات المشتركة فيها الوالدة غير شركة الاتصالات اللى إنت مشترك فيها، لازم كمان تاخُد بالك من إن الوالدة مش رغاية ولا بتدخل على النت كتير من التليفون، لأن وقتها لو طلبت منها جنيه من الـ200 مش هتلاقى طبعاً!

6-   ساعة: سواء كانت ساعة يد أو ساعة حائط، حسب قدرتك المادية، تقدر تشترى ساعة صينى رخيصة بخمسة وعشرين جنيه لليد، أو 50 للحائط، وتقدر تشترى حاجات أغلى حسب قدراتك المادية طبعاً، المُهم إنك بعد ما تشترى تقدر تقنع والدتك إن الهدية فعلاً مُهمة، خاصةً وإن احتياج البشر للساعات مبقاش أبداً زى الأول، بسبب الاعتماد على المحمول كساعة وكمنبه وكهرَّاشة ضَهر كمان عند أكتر من 90% من البنى آدمين!

7-   كتاب تعليم الطهى: هايبقى شكله حلو وهو ملفوف على شكل هدية، وسعره طبعاً مُناسب جداً، وحاجة عليها القيمة وإنت داخل شايلها فى شنطة عليها قلوب والجيران يشوفوك، يقولوا جايب لأمه علبة مجوهرات يا بختها، المُهم يعنى تحاول تقنعها إنك بعد العُمر دة كُله، وبعد ما بقيت شحط طويل عريض، اكتشفت فجأة إنها مش بتعرف تطبخ كويس، فقررت تجيب لها كتاب زى دة!

8-   طقم خشاف أو دستة معالق: أو أى شيئ من هذا القبيل، وهى هدية تليق ببنت على وشك الزواج، تقدرى تشترى لوالدتِك الكلام دة وتقدميه ليها كهدية، ولازم يكون الصنف دة لسَّة مجاش فى الجهاز بتاعِك، وبعد ما الوالدة هتبوسك وتدعيلك، هتقرر إنها تضيفه على جهازِك، يبقى جبتى هدية لماما، ووفرتى على نفسك بند من بنود الجهاز، والأهم من كُل دة إنه على ذوقك، بدل ما هى تشتريه دَقَّة قديمة فى أى وقت تانى، وقال إيه تعملهولك مُفاجأة!

9-   دبدوب أو بارفان "مجاناً": نعم مجاناً، وأرجوك لا تسل كيف أقدم لأمى دبدوب فى عيد الأم، لأنها تقدر تحطه فى الصالون وهايبقى شكله حلو، خصوصاً إنه ببلاش، كُل الحكاية إنك أكيد مريت بتجربة عاطفية دفعت فيها دم قلبك هدايا، وكذلك استقبلت بعض الهدايا، ولازم يكون من ضمنها دبدوب، هات سوليفان ولفه فيه وقدمه لها، هى فى كُل الأحوال قلبها هايرضى عنك، ومش هتقول لك حاجة تزعلك، نفس الكلام لو كنتى بنت، أكيد جالك برفان من الأستاذ اللى جبتيله دبدوب، كويس إنك لسَّة مفتحتيهوش، اتفضلى لفيه فى سلوفان برضو وقدميه للوالدة، غالباً هى مُمكن تكون زاهدة فى الكلام دة، فتخليكى تستعمليه بدالها، وتبقى ضربتى عصفورين بحجر، جبتى هدية، وفى نفس الوقت قدرتى تستعملى البارفان اللى كُنتى مخبياه علشان محدش يسألك مين جابهولك يا شاطرة!

10-  مبلغ من المال: حسب مقدرتك، تتخلَّص من حيرة اختيار هدية، وتمنحها فُرصة شراء ما ترغب فيه، واحتمال تلاقيها ـ بحنية أى أم ـ بتجيب لك إنت هدية بالفلوس دى، أو بتحطهم فى دفتر التوفير بتاعك، ومُمكن متعملش كدة، ومتشتريش بيهم حاجة، وتيجى إنت ـ بنفس طريقة كارت الشحن بتاع رقم 5 ـ تستلفهم منها تانى، وفوقيهم الفوايد، ثم تُطبِّق القاعدة الشهيرة "السلف تلف والرد خسارة"، وتطلع كسبان أكتر من حيتان توظيف الأموال فى عِز مجدهم!