بقلم: أنور الوراقي

1-  لازم تبقى زملكاوى صامت، أو أهلاوى متوفى!

2-  متخليهوش يعرف اسم أُمَّك!

3-  لا تتحدَّث فى السياسة!

4-  لا تتحدَّث فى الرياضة!

5-  متخليهوش يعرف اسم أُمَّك!

6-  شجَّع الزمالك فى صمت!

7-  إوعى يعرف اسم أُمَّك!

8-  إذا تحدَّث فلا تُقاطعه، ولو شتمك إوعى ترُد، وبرضو بلاش يعرف اسم أُمَّك!

9- لازم تكون مقطوع من شجرة؛ وإلا أى قريب ليك يعمل مُصيبة ولو حتى سنة 1890 هتشيل إنت بلوتها السنة دى والسنين الجاية!

10- إياك تفتح بوقك وإنت بتشجع الزمالك، وإياك تخليه يعرف اسم أُمَّك!

11-  ياريت تبيع التليفزيون علشان لو عرف إنك بتشوف (سما المصرى) أو (مايا دياب) مُمكن يخرب بيتك!

12- طبعاً لو بتتفرَّج على سى. بى. سى أو دى. إم. سى سبورت، أو بتحب (أحمد حسن) ولو من بعيد لبعيد، برضو هيخرب بيتك!

13- أكيد هيخرب بيتك برضو لو عرف اسمك أُمَّك!

14- لو جيت تكلِّم البت بتاعتك إوعى تكلمها فى التليفون، ولما تقابلها قابلها فى مكان مفتوح، خليك حريص إن مفيش أجهزة تنصُّت ولا تسجيل؛ علشان السيديهات متتمليش!

15- متخليش فى جسمك علامة مُميَّزة.. لو عندك علامة مُميزة فى دراعك اقطعه!

16- متخليهوش يعرف اسم أُمَّك!

17- إوعى تكون موظف، أو رجل أعمال، أو تاجر، أو بتشتغل فى أى مكان؛ لأن أكيد هايبقى فيه غلطات هاتتمسك عليك مهما كنت حريص، وتتذاع ع الهوا أول ما يزعل منَّك.. باختصار لازم تبقى خالى شُغل.. عاطل يعنى علشان تتقى الشبهات دى!

18- برضو زى ما قولتلك عن موضوع اسم أُمَّك ياريت متكونش نسيته!

19- طبعاً مينفعش يكون عندك حساب فى البنك، وإلا هتروح فى سكة من أين لك هذا مع أول زعل، أكيد كمان معندكش عربية، وإلا أى مخالفة مرور هتوديك للمشنقة مع أول تكشيرة.. إنت فاهم طبعاً!

20- لو كُنت بتشخَّر وإنت نايم، ياريت تعمل اللحمية أو تنتحر، وإلا برضو هتروح فى داهية بسبب الشخير دة مع أول قفشة!

21- اسم أُمَّك... هاه؟!

22- ياريت متكونش مكشَّر فى صورة البطاقة بتاعتَك، وإلا هتروح ورا الشمس برضو مع أول مُشكلة!

23- حاول تحرق كُل الأوراق الرسمية اللى فيها اسمك أو اسم أُمَّك!

24- مش هتقدر تحرقهم كُلهم، وأكيد هتسيب أثر وهيقدر يوصل له، عموماً لو حرقتهم مُمكن يحاكمك بالجريمة دى برضو!

25- اقتل أُمَّك وعيش سعيد بعض الشيئ أحسن لَك.. بس متطمنش أوى، لأن دورَك جاى جاى مهما كُنت حريص!