7 حاجات متتنسيش قبل ما تطلُبي من جوزِك الياميش "إجراءات أمن ضرورية"!

 

بقلم: أنور الوراقي

1-   اختارى الوقت المُناسب اللى يكون مزاجه رايق فيه، مهِّدى للموضوع بهدوء شديد، ونعومة بالغة، يُستحسن يكون اتغدى وشرب الشاى أو القهوة، وريَّح شوية، اضمنى إن أعصابه تكون رايقة جداً، وياريت يكون نسى آخر خناقة بينكم، وآخر مرَّة نكدتى عليه فيها، ومُمكن تستعينى بضوء الشموع، مش عيب والله، أهم حاجة أمنى نفسِك كويس وإلا النتائج هتكون زى الزفت؟!

2-   حاولى متزنقيهوش قبل رمضان بفترة قليلة؛ لأن الأسعار كُلها بتزيد مع زيادة الطلب على كُل حاجة قبل الشهر الكريم، وبالتالى لازم طلبِك يكون بدرى شوية، على الأقل قبل ما رمضان ييجى بست أو سبع شهور!

3-   اختارى المكان المُناسب، ابعدوا عن المطبخ علشان السكاكين والشوك، وابعدوا كمان عن أى وسائل تستخدم للضرب، زى الكراسى والكنب، وعصيان المقشات، وكذلك النجف واللمض، ابعدوا كذلك عن الأدوار العالية لأنه مُمكن يحدفِك من فوق، يعنى من الآخر مُمكن تفاتحيه فى الموضوع وإنتوا فى الصحرا!

4-   لو مُصممة تفاتحيه فى الموضوع وإنتوا فى البيت، ابعدى الولاد فى أى مكان بعيد، عند أختِك، عند أمِك، عند الجيران، المُهم بلاش الولاد يبقوا فى البيت، ودة طبعاً علشان تقليل نسبة الخساير الناتجة عن ثورته الشديدة الأكيدة!

5-   فى كُل الأحوال لازم تتفقى مع دكتور ثقة، أو حد قريبِك أو جارِك يكون على دراية تامة بأساليب الإسعافات الأولية، كمان لازم يكون قريب منك، وتعملى بينكم "سيم" علشان لما يسمع صوت الهبد والرزع والصريخ يجرى يلحقِك على طول، أو يطلُب لك الإسعاف والنجدة والمطافى سوا، لازم كمان تتأكدى إن الطريق مش مقفول ولا مقطوع ولا زحمة، علشان يحاولوا يلحقوكى بسُرعة بدل ما يوصلوا بعد فوات الأوان!

6-   حاولى تعملى حركة جدعنة زى ستات زمان، بيعى الكردان، أو الحلق، أو الغويشة، أو الآيفون، وتعالى فى لحظة صفا وقوليله "أنا بعت لك حتتين السيغة دول علشان تشترى ياميش رمضان، ومتعتلش هَم".. هو أول ما يسمع كلمة "متعتلش" دى، عينيه هتلمع بالدموع، واحتمال يرجَّع لك السيغة بتاعتِك، ويروح يبيع حتة الأرض، ويشترى الياميش!

7-   فى كُل الأحوال.. ومهما كانت الإجراءات الأمنية المُتبعة، فمينفعش تستغنى عن إجراء ضرورى جداً وهو إنك قبل ما تفاتحى جوزِك فى موضوع شراء ياميش رمضان، لازم تكتبى وصيتك قبلها!

التعليقات