أرجوك أعطني هذا الرونق.. "كُل واحد ياخُد باله من رونقه.. ونادي الرونق الحقيقي"!

 

بقلم: أنور الوراقي

توضيح هام: أى تشابُه بين هذا الرونق، وبين أى رونق آخر، هو من قبيل الصدفة البحتة، وكاتب المقال ليس مسئولاً عن رونق أحد، والنبى إحنا ماسكين فى روقنا بالعافية من الآخر!

وعلى رأى الزعيم (عادل إمام) ياريت كُل واحد ياخُد باله من رونقه بعد كدة، لا سيما وأن "اللغاليغ" أصبحت موضة قديمة، خصوصاً بعدما تحوَّل الرونق لحديث المصريين، تركب المترو يقول لَك نازل محطة حدايق الرونق، سواق التاكسى يتخانق معاك على بنديرة الرونق، تمشى فى الشارع تلاقى واحد بيسألك عن شارع رونق باشا، لأ وكُله كوم واللى يقول لَك (رونق) راجع دة كوم تانى!

إيه اللى حصل للمصريين؟ مالهم كدة اهتموا بالرونق فجأة، لدرجة إن مُعظم المواليد مبقاش اسمهم (ساجد) و(سليم) و(بسنت) و(زينة)، وكلهم صبيان وبنات بقوا (رونق)!

وقال لى أحد الأصدقاء أن الحكومة تفكر فى إضافة الرونق لسلع البطاقات التموينية، كُل مواطن ياخُد له اتنين على الماشى يواجه بهم أعباء المعيشة، لكن المُشكلة أن المستوردين مش قادرين يكفُّوا طلبات السوق بسبب ارتفاع سعر الرونق العالمى، نتيجة حرق مزارع الرونق فى بلجيكا!

لأ وكمان تيجى تمسك الريموت كونترول، تلاقى التليفزيون كُله شغال على كدة، (وائل الإبراشى) مستضيف شيخ سلفى بيؤكد على حرمانية الرونق، والأستاذ (مظهر شاهين) بيهدد أى حد يهاجم الرونق بإنه يضربه بالجزمة؛ لأن الرونق أهم من الحياة نفسها، تقلب على (أحمد موسى) تلاقيه بيؤكد إن الرونق دة أهم حاجة فى مصر، وإنه الإنجاز الحقيقى للحكومة رغم محاولات الخونة والمُتآمرين لتشويهه، أما الجماعة إياها فبتؤكد إن الرونق أصلاً إخوانى، وعلى رأى المثل: الرونق ميطلعش من اللحم!

عم (عبد الرحمن أبو سامية) جه لبنته عريس أخيراً بعد ما قرّبت على الأربعين، الراجل طالب دبلة وخاتم ورونق، والعريس مصمم على الدبلة والخاتم بس، والموضوع شكله هيتفشكل للأسف؛ لأن أبوها حالف بالطلاق ماهى متجوزة من غير رونق، بدل ما الناس ياكلوا وشّه، ويفضلوا يعايروه العُمر كُله بإنه رضى يجوِّز بنته من غير رونق، ومستقبل البنت يضيع بسبب الرونق، وجايز تنحرف بعد ما أبوها يموت علشان ترونق نفسها!

وزارة الآثار أعلنت اكتشاف رونق فرعونى جديد فى البدرشين، وجارى استخراجه من باطن الأرض، لكن المُشكلة إن كان فيه مياه جوفية هناك، فالرونق اتبهدل، طبعاً معروف إن كُل الأبحاث أثبتت إن العدو الأساسى للرونق هو الميَّة والصابون، علشان كدة بنخاطب ربات البيوت إنهم يحطوه فى مكان عالى بعيد عن الحوض والتلاجة، وإلا مُمكن طعمه يتغيَّر لما ييجوا يستخدموه!

وعلى المستوى الرياضى، فقد قرر نادى الزمالك كتابة عبارة "نادى الرونق الحقيقى" بجوار اسم النادى على كُل بواباته، بينما حصد الأهلى اللقب بالفعل عن طريق الكاف والفيفا، وقرر النادى الأبيض رفع قضية أمام المحاكم لاستعادة الرونق المفقود بقوة القانون!

وسنشاهد مسرحيات مثل رونق مشافش حاجة، ورونق وسكينة، وأفلام ضربة رونق، وأرجوك أعطنى هذا الرونق، والرونق لا يزال فى جيبى، وطبعاً المسلسلات بقى، ليالى الرونق، ورونق فى عيون وقحة، ولن أعيش فى رونق أبى، والرونق والدموع!

أما الشيف (شربينى) فكان عامل صينية رونق باللحمة المفرومة فى حلقة كسَّرت الدُنيا، وردَّت عليه الست (غالية) وعملت محشى رونق على قناة الرونق والناس، قوم (ريهام سعيد) قررت تجمع تبرعات للرونق، و(توفيق عكاشة) تحدى (البرادعى) إن كان يعرف حزمة الرونق فيها كام عود، وكُل رونق وإنتم طيبين!

اقرأ أيضاً: أغرب اتهام.. "خدش الرونق العام" يثير الجدل على السوشيال ميديا

التعليقات