بقلم: أنور الوراقي

اتخذت الدكتورة (منى البرنس) قراراً بخوض الانتخابات الرئاسية اليوم، وذلك تحت شعار "هندلَّع الشعب ونلاقيه ولا نغديه"، وهو الشعار الذى أعلنته بنفسها، وبكامل إرادتها، علشان كدة لازم نساعد جناب المُرشَّحة المُحتَمَلة، ونقدم لها 8 نصايح تقدر بيهم تكمل مشروع البهججة!

1- بدل ما حضرتك ترقصى على أغانى (روبى)، خلى رقصِك وطنى وارقصى على بشرة خير مثلاً!

2- الجنسية موضوع مُهم جداً، ياريت تتأكدى إن معندكيش جنسية تانية، وإن الوالد والوالدة معند همش جسيات تانية؛ كُلنا فاكرين المُرشَّح اللى سره اتفضح بجنسية الوالدة الأمريكانية قبل كدة، بلاش نكررها!

3- لازم تذاكرى كويس فى الخضار والطيور والمواشى، وتعرفى حزمة الجرجير فيها كام عود، ووقفة البقرة فى السوق بكام؛ علشان الأستاذ الدكتور (توفيق عكاشة) ميزعلش منِّك ويقدر يديلك صوته!

4- بالمُناسبة.. ياريت متستعمليش "تويتر" كتير لأنه بيجيب نتايج عكسية، واتعلمى من تجربة اسمه إيه اللى بقى موظف فى تويتر بدل ما يبقى رئيس مصر!

5- ياريت تكونى فعلاً قادرة تدلَّعى الشعب وتلاقيه كمان زى ما وعدتى، علشان مش عايزين الوعود دى تطلع زى وعود مشروع النهضة كدة.. فنكوش!

6- لو قالولِك تعالى نعمل لقاء مع (يسرى فودة) قبل الانتخابات إوعى توافقى، اللى بيعمل كدة مبيفلحش!

7- حاولى تشوفى حَل فى الأصوات الباطلة، واكسبيهم لصفِّك بأى طريقة، لأنها مكارة وبتخلى مُرشَّح مش واخد باله بيطلع فى المركز اللى بعد الأخير.. طب وربنا حَصَلت!

8- حضرتك قولتى فى إعلان الترشُح إنك هتوضعى الأساسات السليمة لبناء الدولة المصرية الحديثة، ياريت نراعى وإحنا بنعمل الأساسات إن أكيد فيه ناس هترقص على سطوحها، فنزوِّد الخرسانة شوية، أو نعملها على سوست!

اقرأ أيضاً:

بالصور: منى البرنس لرئاسة الجمهورية؟ "هتدلَّع الشعب من باب لاقيني ولا تغديني"