رمضانك.. 7 علامات مميزَّة لمسلسل "الحالة ج".. "مش ج خالص"!

وفى رمضان يحلى الكلام عن الدراما والمسلسلات، وبرامج المقالب.. علشان كدة مش هنكسر القاعدة، لكن هنبُص لها من زوايا مختلفة شوية!

1- مسلسل الحالة "ج" غنى عن التعريف، فهو أكثر المسلسلات عرضاً على كُل القنوات، الفضائية، والأرضية، ومحطات الراديو، ولو فتحت التلاجة تجيب إزازة ميَّة ـ بعد الفطار طبعاً ـ ممكن تشوف حلقة بُكرة طالعة لك من الفريرز عادى جداً، أما قبل الفطار فعادى تلاقيه ناطط لك فى أى إشارة مرور!

2- مسلسل الحالة "ج" بناءً على ما سبق يؤكد إن الحالة مش "ج" خالص بالنسبة لتوقيتات العرض ومدى انتشاره، وقد يكون المقصود بهذه الحالة هو المستوى الفنى للمسلسل، عموماً لسَّة هنشوف، وإن كان الجواب باين من عنوانه!

3- مسلسل الحالة "ج" خلى المشاهدين يشغلوا عقولهم على أقصى درجات الفهم والفكر علشان يفتكروا هما شافوا البطلة دى فين قبل كدة، وفى الآخر بعضهم افتكر، ومعظمهم لسَّة مش عارف إن دى (حورية فرغلى) باللوك الجيم الجديد!

4- فى برومو المسلسل لقطات معادة ومجمعة من مسلسلات التلات أربع سنين اللى فاتوا، كلها بطلها (أحمد زاهر) الذى قرر أن يقوم هذا العام بتقديم شخصية هى مزيج بين (أحمد عز) و(أحمد السقا) و(خالد سليم) و(زكى جمعة) سوا.. مين (زكى جمعة) دة؟ اتفرج ع المسلسل وإنت جايز تعرف!

5- بصراحة مسلسل الحالة "ج" بيفكرنى بالزمالك.. منتشر جداً، وأخباره وظهوره مالى الدُنيا، ومع ذلك فى الآخر الحصيلة دايماً "ج" برضو!

6- مخرج الحالة "ج" هو (حسين شوكت) صاحب سيت كوم (أحمد اتجوز منى)، ومن الواضح إن جوازهم نتج عنه مليون مشكلة كما جرت العادة فى أى جوازة طبعاً، فخرج لنا عمل زى الحالة "ج"!

7- أعذر جداً كُل مَن سيغضبه هذا الموضوع خاصةً عندما يصرخ "إحنا نهرب من حصار حلقات مسلسل الحالة ج" ونفتح النت علشان نلاقيه فى وشنا هنا كمان؟ يا سيدى حقَّك عليَّا روح افتح الدولاب علشان تلم هدومك وتطفش وإنت تلاقيه هناك برضو زى ما قولتلك فى النقطة رقم 1.. كل سنة وإنت طيب!

التعليقات