كيف تصطادين عريسا بأقل مجهود؟

"مفيش بنت وحشة، لكن فيه بنت قليلة الحيلة"، القاعدة بتقول كده، البنت لا بجمالها ولا مكياجها، البنت بحيلتها.. ذكاءها هو اللي بيقول هتتجوز امتي؟ ومين؟، ولأن قلة الحيلة خلت 11 مليون بنت لسه عانس حسب تقرير للجهاز المركزي للتعبئة والإحصاء، فاحنا هنقول لك أصول الحيلة، عشان تتلحلحي، وتخطفي شاب من وسط 2.5 مليون شاب لسه متجوزوش.

التفاهة كنز لا يفني
فكك من أفكار أن شخصيتك قوية، لأنها بتقلل فرصتك في الجواز، واتمسكني ولما تتمكني يحلها حلال، وإياك تبيني له أنك بتحبي تقري، أو أنك بتابعي برامج الأوبرا، وبتحضري حفلات الباليه، الرجل الشرقي مبيحبش المثقفة، بصي كلميه عن حبك للطبخ وكرهك للأكل الكتير، عن حبك للبيت، الفسح يااااه بتكرهيها سم، خليه يحس أن طلباتك بسيطة جداً.
البسي فاتح
خليكي مستعدة لمقابلته في أي وقت، بمعنى أنك تهتمي بمظهرك الأنيق، وألوان لبسك، وابعدي عن الألوان الداكنة، عشان ميقولش عليكي نكدية، ولو لقتيه لابس في يوم أسود، قوليله بلاش الأسود دا لون كئيب، أنا مبحبش النكد خالص.
وماله نشرب شاي
لو صادفتي شخص لطيف وقالك تعالي نشرب شاي أو قهوة، مفيش مشكلة طالما "In public"، وإن شاء الله يبقي فيه "Feeling"، أوعي تعملي رابعة العدوية، سيبي نفسك تتعرفي عليه، بس هي كوباية شاي واحدة، ليسوق فيها، واشتري منه، وسيبيه يقول كل اللى عنده.
اعملي أسرة واطلعي رحلة
لو كنتي طالبة جامعية اشتركي في أكبر عدد من الأسر الطلابية، لازم تكتري معارفك من الزملاء، ومتفوتيش رحلة أو حفلة الا وتحضريها، الرجل يحب البنت المرحة التي تشاركه هواياته، اوعي تنسي تعزميه من وقت للتاني لأنه غالبا هيبقى مفلس.
أنت خيرة
لو معندكيش حاجة تعمليها ولا شغل ولا مشغلة، شاركي في اكبر عدد من الجمعيات الخيرية، واحضري في كل المناسبات الاجتماعية اللي بينظمونها، خليكي نشيطة وانزلي 6 الصبح، الناس دول بيتجوزوا من بعض.
اكتري في السوشيال ميديا
سيبي السوشيال ميديا تاخد مجراها، يعني اقضيها فيسبوك بكام أكونت، كل واحد بشخصية معينة، أكونت للمحجبة الملتزمة، والبنت المرحة، والبنت المتمردة، والبنت التافهة، العبي علي كل الأطراف، ومتقلقيش مصير الملوخية تيجي تحت المخرطة.
ثواب الجماعة
التراويح ثم التراويح, البنات بتروح التراويح عشان تتجوز، والستات عشان تدور لأولادها على عرايس، وأهو عريس ملتزم أحسن من عريس مش هيجي.
خمسة وخميسة
لو ربنا كرمك بواحد ممكن يجي منه، حاوطي عليه، ومتقوليش لحد من صحباتك، الحاجات دي بتتنظر، ولو قالك أعرفك على ماما، خليكي عارفة أن حموات ماري منيب خلصوا، الحموات اليومين دول، عايزين اللي يصبح عليهم ع الواتس آب، ويعلق عندهم ع الفيس بوك، ويعملهم تاج في صور الانستجرام.

التعليقات