حصريًا.. أول حوار مع النجمة "فوفو" بعد عودتها من السفر!

تألقت وتألقت وشاهدناها جميعا فى الحلقات الأولى من مسلسلها (هتبوسنى وللا لأ؟) الذى يعرض الآن على شاشة التليفزيون المصرى.. استمتعنا بأدائها الراقى وفساتينها القصيرة.. والآن هى معنا بعد عودتها من السفر.. فى أول حوار حصرى لنا.

- استمتعنا بدورك الرهيب الممتع فى مسلسل (هتبوسنى وللا لأ؟).. ازاى اشتركتى فى المسلسل؟

* بصراحة أنا بقالى فترة وانا باستنى ورق كويس.. يمكن عشان كل الورق اللى جالى الفترة اللى فاتت كان ورق كشاكيل وكراكيس وانا مش باحبه.. عشان كده قبلت سيناريو المسلسل ده لأنه كان جايلى ورق (إيه فور)!
ـــــــــــــــــــــــــــــــ
- نعتبر ان ده انفراد لينا ان حضرتك بتعرفى جودة السيناريو من نوع الورق؟

* كل الوسط عارف السر ده عنى، لدرجة ان فيه سيناريست جابلى سيناريو بتاع مسلسل على ورق (بفرة)، حرقته ورفضته علطول.
ـــــــــــــــــــــــــــــــ
- وليه رفضتيه؟

* عشان كان (بينفـِّس)!
ـــــــــــــــــــــــــــــ
- لاحظنا فى مسلسل (هتبوسنى وللا لأ) كمية البوس اللى ف كل مشهد لدرجة ان احنا تصورنا ان أكيد حضرتك استعنتى بدوبليرة يعنى عشان تريحى شوية.. هل ده بوس هادف؟

* طبعا.. شوفى.. أنا ماحبش فى حياتى قد البوس الهادف.. أنا اتعرض عليا كتير انى اتباس فى السينما بس قلت لأ.. لازم البوس يدخل كل بيت.. عشان كده انا اخترت التليفزيون.. أنا هدفى الأسرة كلها!
ـــــــــــــــــــــــــــــــــ
- احنا عارفين ان حضرتك دلوقتى هتروحى من المطار على الكباريه علطول.. مش هنقدر نعطلك أكتر من كده.. بس فيه سؤال أخير.. المسلسل اللى بيتعرض حاليا (هتبوسنى وللا لأ؟).. هل ممكن ناخد منك انفراد هل هوه هيبوسك فى آخر المسلسل وللا لأ؟

* لا معلش.. مش عايزة أحرق المسلسل.. خللى المشاهد يكتشف لوحده فى آخر حلقة.. وعلى فكرة فيه مفاجآت كتيرة لسة.. وفيه ناس كتيرة هتتباس فى المسلسل. مش انا بس.. أنا أحب البوس يتوزع بالتساوى والعدل لأنى باحب البطولات الجماعية!

التعليقات