إعلان هام: رمضان 10 نجوم "مدفع مخصوص.. مسلسلات ع الكيف.. وصيام بديل"!

كُل عام وأنتم بخير، يقترب شهر رمضان، وتقترب معه العروض الخاصة للسلع، والسهرات الرمضانية فى الخيمة اللى تحبها، وكذلك المسلسلات، وطبعاً برامج المقالب!

شركة "رمزى & دونالد" العالمية الاستثمارية قررت الإعلان عن رمضان جديد تماماً هذا العام، مع الشركة لوحدها فحسب، والشركة هى إحدى المؤسسات الرائدة فى عالم الاقتصاد والترفيه والبرامج التليفزيونية والمسلسلات كمان، وذلك حسب إعلانها المنشور فى جريدة أخبار أول إمبارح، التى تصدُر فى جزيرة قبرص بعد الغداء!

إعلان "رمزى & دونالد" يؤكد أن بمقدورك مُشاهدة المُسلسل اللى على كيفَك، بأبطالك المُفضلين حسب اختيارك، ما عليك إلا أن تملأ الأبليكيشن وتسدد المبلغ المطلوب، وتختار أسماء المُمثلين والممثلات اللى عايز تشوفهم فى مسلسل واحد، وتختار كذلك القصة والسيناريو، ومُمكن تدخُل تمثِّل معاهم، وتختار كمان نهاية المسلسل اللى تعجبَك، بعد دفع الرسوم طبعاً!

وتؤكد الشركة أن بإمكان العميل المُميَّز اختيار نجمته المُفضلة لتمثيل القصة والمشاهد التى يرغب فيها، مع التأكيد على ارتفاع أسعار بعض النجمات أكثر من غيرهن، خصوصاً لو حضرته ناوى يمثل معهن، ويختار كمان الأحداث والنهاية على كيفه، إذ تحتل المرتبة الأولى النجمات (هيفاء وهبى) و(غادة عبد الرازق) و(غادة عادل) و(سمية الخشاب) و(مايا دياب)، ولا يُمكن الجمع بينهن فى مسلسل واحد، إلا لو كان العميل ملياردير!

تنبيه هام: الحد الأقصى لعدد مرَّات إعادة اللقطات عند تصوير أى مشهد فى مسلسل من بطولة عميل الشركة مع إحدى النجمات الجميلات، هو 3 مرَّات فقط؛ علشان العميل ميسوقش فيها ويستهبل، خصوصاً لو كان المشهد حلو أوى وعاجب حضرته، ويتم إضافة إعادات جديدة لتصوير المشاهد ـ حسب رغبة العميل ـ حال سداد المُقابل الإضافى المطلوب، وموافقة النجمة على ذلك طبعاً، وهو وشطارته!

أما مدفع رمضان فلو كان بيتَك بعيد عنه، ومش بتقدر تسمعه كويس لما بيضرب، فبتدفع برضو وتملا الأبليكيشن، ونجيب لك المدفع تحت البيت المغرب، ونخليه يضرب ليك وللجيران مرَّة واحدة، ولو عايز أكتر من كدة بتدفع الفرق ويضرب لك كذا مرَّة، ولو جيرانك حابين يشتركوا معاك فى المصاريف إنتوا حُرين سوا، والشركة عندها خدمة حرمان الجيران من صوت المدفع لو كان دمهم تقيل، ومش عاوزين يدفعوا معاك، وإنت شايف إن خسارة فيهم، وطبعاً الخدمة دى عليها رسوم إضافية!

كمان تقدر تكون ضيف لأى برنامج مقالب تحبه، وحضرتك بتختار كمان نوع المقلب، وكمية الخوف، والصريخ والصويت، ومين من النجوم يعمل فيك المقلب، ويعمله فى طيارة واللا سفينة واللا غابة، وطبعاً كُل نوع وله مصاريفه الخاصة، وتقدر كمان تعمل مقلب فى حَد صاحبك، أو جارك، أو قريبَك، إنت بتجيب لنا بياناته، وتدفع المصاريف، وخلى الباقى علينا، هنطلَّع لك عينه، ونرجعهولك جُثة لو عايز، ما دام هتدفع!

الشركة كمان بتنظِّم رحلات ترفيهية، وسهرات رمضانية، وجلسات ذكر، وخيام رمضانية، وكذلك تقدر تطير بالطيارة تتسحَّر فى المغرب أو تونس، وترجع تفطر فى مصر، فتختصر عدد ساعات الصيام!

كما قالت شركة "رمزى & دونالد" أن فى الشركة مُحترفين للصيام، يقدروا يصوموا فى اليوم الواحد مرَّتين، وبالتالى اللى مش عايز يصوم علشان بيجوع بسرعة، أو مش بيستحمل العطش خصوصاً فى عز الصيف، يقدر يدفع 1000 جنيه فى اليوم، ويعمل توكيل لأحد موظفى القسم علشان يصوم بداله، مع وجود خصم هائل للى هيشترى صيام الشهر كُله، فهيدفع 20 ألف جنيه فقط بدلاً من 30 ألفاً!

طبعاً لو حضرتك مُتمسِّك بالصيام بنفسك فهو حقك، لكنك مش قادر تروح الشغل، أو خايف تتأخَّر فى زحمة المرور ومتعرفش ترجع البيت بسرعة قبل المغرب، مُمكن نبعت حد تانى مكانك الشغل من قسم الشغيلة عندنا فى الشركة، كُل ما عليك بعد ما تملا الأبليكيشن، وتدفع المصاريف، إنك تفهّمه ظروف شغلك وطبيعته، وهو هيحل محلك تماماً فى كُل حاجة، سواء كُنت من بتوع فوت علينا بُكرة، أو من بتوع اقفل الراوتر وافتحه تانى، وطبعاً فيه إمكانية إضافية ـ بعد سداد الرسوم ـ إنه ممكن يتخانق بدالك مع زمايلك فى الشغل، ويقول لهم "متعصبونيش عليكم وأنا صايم" ويولَّع لك فيهم كمان!

التعليقات