1500 سبب لإلغاء أُم الدوري العام "بقلم: مش مرتضى منصور"!

من البداية بقول أهو، أى حد هيتنفِّس وهو بيقرا المقال، أقسم بالله لأجيبه بلبوص، كلامى واضح، تسمعونى كويس، علشان اللى هيهش دبانة من على وشه، هطيرهوله، منبقاش إحنا قاعدين نحرق فى دمنا، وإنتوا مشغولين بالدبان!

دلوقتى الدورى العام باطل، أنا بقول لـ(هانى أبو ريدة)، دوريك باطل يا سى (هانى)، إنت وشوية البتوع اللى معاك، وابقوا خلوا (محمد كامل) ينفعكم، وبقول لوزير الرياضة إوعى تتدخَّل فى الموضوع، وإلا هايبقى دة السبب رقم 1501 لإلغاء الدورى، خليك إنت فى مركز شباب الجزيرة، وبطولات الجمباز الإيقاعى، وسباحة الفراشة، وهَش الدبان!

دلوقتى (علاء) بيه مُدير النادى هيطلع لكم بالمستندات، وسَّع إنت وهو شوية كدة علشان عربية المُستندات تعرف تدخُل، إحنا معندناش 100 سبب علشان الدورى يتلغى، ولا 200، كلامى واضح، سامعنى يا (مدحت يا شلبى)؟ أقول إنت كُنت فين إمبارح؟ وكنت سهران مع مين؟ كفاية بقى دة ريحتكم بقت تقرف!

الأخ (أحمد مجاهد) اللى عامل فيها عنتر وطالع يتكلم مع (شبانة) النهاردة، هسجنكم إنتوا الاتنين، فاكرين ساندوتشات الحلاوة بالقشطة أم مكسرات فى سادسة تانى؟ أقسم بالله لأسجنكم بسببها، كلامى واضح، والدورى هيتلغى يعنى هيتلغى، ابقوا خلوا تليفزيون السجن يعرض لكم دورى مالاجاش بقى!

بُص يا بيه، شوف المستند أهو، صورة للاعيب فريق طنطا فانلته مقطَّعة، دة يليق بدورى عُمره سبعتلاف سنة؟ اتفرج يا بيه، بيقول لَك رعاية، واستثمار، ودعم من الدولة، آدى سبب لإلغاء الدورى، أقسم بالله ما أنا سايبكم، شوف اللقطة دى، المُخرج سايب الانفراد فى ماتش إنبى، وجايب لى (منخر) وهو بيشد فى شعر جاره على الدكة، أقسم بالله لأسجن المخرج و(منخر) والمهاجم اللى ضيَّع الفرصة، وبرضو هلغى الدورى للسبب دة، عِد عندك الأسباب أهيه!

البيه الرائد (محمد عبد السلام) رئيس نادى المقاصة، كلامى واضح، هاتيجى ملعب بتروسبورت فى المعاد اللى أنا عايزه، وتخلى لاعيبتك تنزل، وتسيبونا نكسبكم ماتشين (ماتش جهاد جريشة وماتش محمد فاروق)، هاتبقى اللواء (محمد عبد السلام)، مش هاتيجوا، والله العظيم لا ألغى الدورى، وهخليك صول!

أنا بَعَت المهندس (هانى زادة) النهاردة على سويسرا، وهو قاعد جنب التليفون، ومعاه المستندات اللى فيها الألف وخمسمية سبب لإلغاء البطولة، هى رنَّة واحدة منى، والدورى يتلغى، خُد عندك، مُكالمات متسرَّبة، مواعيد مضروبة، أختام مزوَّرة، دة غير باقى الأسباب اللى هعلن عنها فى مؤتمر صحفى فى حينه هنا فى نادى الزمالك، فى مكتبى، وورايا فى الخلفية صورتى، أجرأ رئيس نادى حصل فى تاريخ البنى آدمين، أصل أنا رئيس دكر، مش زى شوية العيال بتوع الجبلاية والإعلام، أقسم بالله ما أنا سايبكم، وإن كان فيكم راجل يورينى نفسه!

وآدى قرار مجلس إدارة نادى الزمالك، وعليه توقيعاتى، هنعمل الجمعة الجاية جمعية عمومية غير عادية هنا فى النادى، والأعضاء هيصوَّتوا على سحب الثقة من مجلس إدارة اتحاد الكورة، وهُما أصلاً محلولين بحُكم قضائى، سامعنى يا سيادة الوزير؟ كفاية قرف بقى، ريحتكم هوووف فاحت، مش عارفين نتنفس، أنا بجيب عبوة "الجليد" بفتحها مبتقعدش ساعة، أنا بقول أهو، عندكم مهلة لحد الجمعة الجاية، الزمالك ياخُد كُل نقط الماتشات اللى خسرها، ويتعاد ماتشين المقاصة ونكسبهم، والأهلى يعتبر مغلوب فى آخر 6 ماتشات، نكمل الدورى.. طلب من دول متحققش، يبقى كُلكم هتطلعوا من الجبلاية على أبو زعبل.. كلامى واضح!

مقال تخيُّلى ساخر، كتبه: أنور الوراقي..

التعليقات