10 فروق بين "حلال" سمية الخشاب و"حرام" فاتن حمامة!

بعدما طالعتنا أفيشات مسلسل الحلال للنجمة سمية الخشاب فى كُل الشوارع، لقيت نفسى بفتكر فيلم الحرام للنجمة الراحلة فاتن حمام، مش عارف ليه المُقارنة حَبَكت، جايز بسبب التناقض بين الاسمين، أو علشان فاتن وحشتنا، أو علشان بحب سمية برضو، متفهمش، المُهم إن فيه 10 فروق بين الاثنين:

1-   فى أفيش "الحلال" سمية الخشاب مُتألقة بالطقم الأحمر، وفى "الحرام" فاتن حمامة حزينة بالطقم الأسود.. تحسِس إن فى "الحلال" ناس شاريين موبايل جديد وفرحانين بالصورة بتاعته ودة سقف طموحهم، وفى "الحرام" محترفين عينهم على جايزة الأوسكار!

2-   بالمُناسبة، فمش ضرورى الحلال يكون بهججة كدة وفيه إيحاء كدة إننا هنقدم مسلسل من شارع الهرم، إنما طبيعى الحرام يكون كئيب ويجيب الغم زى ما عملت فاتن!

3-   ندخُل فى الأهم: الحلال تأليف سماح الحريرى وإخراج أحمد شفيق، الحرام قصة يوسف إدريس، سيناريو حوار سعد الدين وهبة، وإخراج هنرى بركات.. طيب نقارن إزاى، دة حتى عيب!

4-   النبذة التى عرفناها عن دور سمية فى الحلال هى لفتاة فقيرة فى الحارة المصرية، تضطر للعمل مع الدجالين للنجاة من حياة البؤس، وفى الفيلم كانت فاتن فقيرة أيضاً، وتسبب "جدر البطاطا" فى دخولها سكة الحرام مُرغمة، ولا نعرف هل تدخل سمية الحلال مُرغمة برضو بنفس الطريقة واللا إيه؟ خصوصاً مع التشابه بين الفقر والبيئة باختلاف إن فى الحرام كانت قرية بدل الحارة!

5-   فيلم الحرام تم ترشيحه لجائزة السعفة الذهبية لمهرجان كان السينمائى، كما تم تصنيفه فى المركز الخامس ضمن أفضل مائة فيلم فى تاريخ السينما المصرية، مسلسل الحرام ربما يكون مُجرَّد تواجد فى الموسم الرمضانى، وربما يكون غير ذلك، لكن المقارنة بالتأكيد لن تكون لصالح المسلسل!

6-   مسلسل الحلال بطولة بيومى فؤاد، يسرا اللوزى، ودينا فؤاد ومها أحمد.. فيلم الحرام بطولة زكى رستم، عبد الله غيث، وحسن البارودى.. طبعاً قد يقول قائل إن بيومى فؤاد لو كان موجود أيام فيلم الحرام أكيد كانوا هيلاقوله أى دور زى ما بيحصل حالياً، لكن عموماً قارن بين الأسماء لو جالك قلب تعملها!

7-   هل الجمهور المُهتم بمسلسل الحلال، سيكون نفس الجمهور العاشق لفيلم الحرام؟ طبيعى لأ؛ لأن الزمن اتغير، والثقافة كذلك، وأيضاً السلوك، وحتى المعايير الفنية، والمُنتجين!

8-   الحلال مسلسل 30 حلقة، يعنى لا غنى عن شوية مَط، حبة تطويل، رقصة أو أغنية لزوم تزبيط المُشاهد، دة غير الإيفيهات الضرورية فى ظل وجود بيومى فؤاد، الحرام فيلم ساعة ونصف، يعنى هات من الآخر، ومفيش إيفيهات، تخيَّل زكى رستم بيقول إيفيه من بتوع بيومى فؤاد!

9-   الحلال الناس هيشوفوه ببلاش وهُما قاعدين فى بيوتهم.. الحرام كانوا بينزلوا علشان يشوفوه بفلوس فى السينما.. والسؤال: لو الحلال فى السينمات، كام واحد كان هينزل يشوفه ويدفع فيه فلوس؟!

10- على المستوى الفنى والجماهيرى أعتقد إننا بعد ما نشوف 30 حلقة من مسلسل سمية الخشاب الجديد، سنتأكد أنه ـ على المستوى الفنى ـ فإن حرام فاتن حمامة حلال، بينما حلال سمية الخشاب حرام!

التعليقات