حديث الأربع سنين اللي فاتوا

- إحنا بنموت على الطرق، مصر فيها أكبر عدد ضحايا حوادث في العالم، ارحمونا

- ‏حاااااضر هنعمل طرق جديدة
- ‏وايه لازمة الطرق دلوقتي؟ الأولى الصحة
--الناس بتموت في المستشفيات والصحة في النازل والناس كلها عيانة، ارحمونا
- حاااااااضر هنعالج من فيرس سي ونجدد المستشفيات ونحسن الصحة ونعمل تأمين صحي.
- ‏وايه لازمة ده كله لو مفيش بطاطس؟

 

- على فكرة مفيش دولة بتتقدم من غير تعليم، اصلاح التعليم هو الحل وبعدين نتكلم في اي حاجة تانية، ارحمونا
- ‏حاااااضر هنغير المناهج ونطور التعليم ونبني مدارس ونقفل مراكز الدروس الخصوصية.
- ‏لأ طبعًا كل ده غلط، ازاي تقفل المراكز وايه فايدة التابلت مش لما الاول تكبر الفصول والعيال مش مهم يتعلموا عربي، الانجليزي لغتنا الام، الأولى تأمنوا البلد.

 

- ‏على فكرة انتوا مبتسمعوش الشباب، وكلها عواجيز ومفيش فرصة حقيقية للحوار معاهم، لازم تسمعوهم، ارحمونا
- ‏حاااااضر احنا هنعمل مؤتمر شباب ومنتدى ونسمع ونتناقش
- ‏وده ايه لزمته دلوقتي ولا فايدته؟ غلط طبعًا ومالوش لازمة، الأولى تشوفوا التعليم.

 

- المدن زحمة والناس ماليين العشوائيات ومفيش اي تخطيط والعاصمة اتخنقت وتشوهت، ارحمونا
- ‏حااااااضر، هنعمل مدن جديدة وعاصمة جديدة ومساكن ننقل فيها إللي في العشوائيات
- ‏وده ايه لازمته دلوقتي، هو انتوا هتركزوا في الحجر قبل البشر؟ الأولى تشوفوا الطرق

 

- احنا بنستورد اللي بناكله، والارض الزراعية راحت، ارحمونا
- ‏حاااااضر، هنستصلح اراضي وتطرح ما يغنينا ولو جزئيًا
- ‏وده ايه لازمته دلوقتي، مش لما تحلوا موضوع المية

 

- شوفوا الدول اللي حوالينا اتقدمت إزاي، دبي بيجيلها سياحة من كل حته في الدنيا علشان عندها أكبر برج وأفخم اوتيل وأحدث مركز مؤتمرات، ارحمونا
- ‏حاااااضر هنعمل اطول برج في افريقيا ونجهز قاعة مؤتمرات كبيرة ونبقى زيهم او أفضل
- ‏وده ايه لازمته؟ ايه أهمية أطول برج وقاعة مؤتمرات؟ الأولى تشوفوا المصانع

 

--الإرهاب محاوطنا وبنتقتل كلنا والدول معظمها شايفانا قليلين وسمعة مصر مش قد كده، ارحمونا
- حاااااضر، هنسلح الجيش بمعدات حديثة وهنحارب الارهاب في سينا وهنقبض على كل حد بيسمم البلد، وهنقابل الدنيا كلها ونخلي وجهة نظرهم عننا تتغير
- ‏وده ايه لازمته دلوقتي؟ الأولى نطور البلد

 

- التموين زي الزفت والعيش فيه مسامير، والزيت بتاع عربيات، ارحمونا
- ‏حااااااضر هنحسن التموين ومش هتبقى ملزم بسلع معينه، وكمان هنعمل معاش تكافل وكرامة
- ‏وده ايه لازمته دلوقتي؟ الأولى نعمل حاجة في الصحة

 

وعلى الجانب الآخر...
شفت البيض البلاستيك؟، شفت القطة اللي بتولد كتاكيت؟، شفت الفيل ابو عين ازاز؟، العيش بيمنع الحمل، الارز بلاستيك، الكهربا هتولع في الملوخية، شاهد قبل الحذف، سوسو ولولو بيحبوا بعض، هانيا وهنداوي اتطلقوا، درية وسماعين بينهم مشاكل، عرفت إللي حصل لفلان؟، شفت فستان علانه؟، فضيحة مدوية في فرح إبن العمدة، المقطع الذي سيهز عرش قلب كل عيلتك، ارسلها لخمسة اشخاص وهتكسب كيس شيبسي، حبيت اقولك كل سنة وانت طيب قبل الكل، والحمدلله على كل شيء، الخاينين ملوا البلد، محدش بياكلها بالساهل، الوحدة محدش بيحس بيها غير الموحود أوووووووي، وتوفت بنت خالة عمة مرات خال ابن بنت عمي، والصاحب الجدع رزق، والست المصرية نكدية، والرجالة المصريين مبيعرفوش يبقوا زي مهند، وشاهد فتوى الشيخ الجليل في شرعية غسل اليدين بدون ماء، وهتتعاطفوا امتى من ابناء قرية زلومة الفيل ضد ما يتعرضون له من وحشية، ويا عيني عليا قلبي طيب بس الناس وحشين، وواحد صاحبي موثوق فيه قالي، وجمعة مباركة
ولسه العرض مستمر.
#مكاويات
التعليقات