سر العلاقة بين ام كلثوم وكباب الحلة !
Tuesday, April 25, 2017 - 11:34
كتب:
أم كلثوم المفضلة بالنسبة لي طول الوقت.. وأحيانا اختار أغنية واحدة تعيد وتزيد.. بتساعدني اكتر على التأمل.. وبصراحة "حيرت قلبي معاك".. اكتشفت انهاردة أنها أكتر أغنية شبهي ويمكن شبه ستات كتير.. وتعتبر حيرت معاك كتالوج تشريح لنفسية شريحة من النساء مش قليلة.. يبدو أن أحمد رامي كان طبيب نفسي مش شاعر بس..
1- الست بتقول "خاصمتك بيني وبين روحي.. وصالحتك وخاصمتك تاني" يا خراشي.. هو في دلع كدة.. بس الدلع بتاعنا أحيانا بيعجز الرجالة عن فهمه.. وبتقلب خناقة.. وبالتالي ممكن نخاصمهم ونصالحهم من غير ما هما يعرفوا ليه.. وأحيانا احنا نفسنا مش بنكون عارفين ليه.. بس اهو كدة.. والراجل الشاطر اللي يفهم ده ويريح ويسأل "مالك في ايه.. ويسأل بجد.. مش تقضية واجب" وهو وحظه لأن مش اكيد برضو أن الست هتجاوب بسهولة..
2- من الأول الست رمت الكرة في ملعب الراجل.. وقالت له "حيرت قلبي معاك" وطالما وصلت للقلب.. يبقى من الأخر انت الغلطان.. ومتحاولش تدافع عن نفسك..
3- "وأقول أبعد يصعب علي روحي.. تطاوعني ليزيد حرماني" يعني مفيش جدية في الخصام.. ده دلع ومياصه أفهموها بقى..
4- "يا قاسي بص في عينيا.. وشوف ايه انكتب فيها" يعني متقوليش عينيك حمرا ليه.. اكيد معيطة ومتشحتفه.. بص بقى.. أيون بص أكتر.. وأعرف.. ها شايف ايه !!! معقولة مش شايف "دي نظرة شوق وحنيه.. ودي دمعة بداريها.. وده خيال بيين الأجفان".. انت شكلك أعمى..
5- " ياما ليالي أنا وخيالي" اه اربط هنا بقى.. هو ده مربط الفرس.. انا وخيالي.. وحقيقة علمية الأنثى خيالها خصب أكتر من الذكر.. وبالتالي أقل حاجة بتحصل.. ليها مليون سيناريو بيرسمهم الشيطان ويعمل لهم مسلسلات تركي في خيالنا.. فأرحمونا مش أنتم والطبيعة والشيطان..
6- بعد كل ده "ابات افكر في اللي جرى لك وجرى لي".. وأفكر وأفكر وأفكر.. وأخيراً " ح أفضل أحبك من غير ما أقولك.. إيه اللي حير أفكاري لحد قلبك ما يوم يدلك.. على هواي المداري" هي كدة جابت اللبة.. ومش هقول أي حاجة.. أعرف لوحدك بقى.. يعني من أول الأغنية واحنا ظالمين الراجل.. وطلع في الآخر ميعرفش أصلا أنها بتحبه.. طيب ليه يا سومه كدة..
7- مسك الختام الجملة التي أبكتني أنا شخصياً "وأقول يا قلبي ليه تخبي .. وليه يا نفس منعاني" طيب مهو من الأول يا ست.. ده سؤال مفيد ويحل المشكلة من أولها.. ليه نخبى من الأساس.. ما نقول اللي سهرنا وبكانا ونصور لهم ضنى روحنا.. بدل ما نحطهم في تحدي المليون إجابة ومش هيعرفوها واحنا عارفين ده كويس..
8- لكن أحمد رامي فعلها.. وحل لنا معضلة "حيرت قلبي معاك" وهبدنا الروعة "مدام تحب بتنكر ليه"..
والنبي صديقاتي النسويات.. ده بوست من وحي سماع أغنية "حيرت قلبي معاك" أكتر من 4 مرات ورا بعض وانا بعمل كباب حلة لجوزي.. يعني دي تأملات هزلية ساخرة.. وأيون عارفة أن الرجالة معظم الوقت بيطنشوا ومش بيهتموا.. لكن والنعمة في شريحة غلبانة معانا برضو.. ونفسهم يفهموا.. ممكن نديهم فرصة.. ومدام نحب بننكر ليه.. نفكنا شوية من عزة نفسي منعاني.. ولو الراجل مقدرش ده.. يبقى يلا بالسلامة السكة اللي تودي.. وخسارة فيهم كباب الحلة.. والبراونيز
التعليقات