أكدت دراسة بريطانية أن تعدد الزوجات يطيل من عمر الرجل بنسبة تصل إلى 12% ، كما يؤدي إلى سعادته حيويته، وتحسّن أحواله المهنية والمادية.
وأفادت الدراسة التي أجراها باحثون من جامعة شيفيلد البريطانية أن الزواج بامرأة ثانية يمنح الرجل ثقة في النفس وراحة أكبر، الأمر الذي يمكّنه من تحقيق كل مشاريعه وأحلامه.
وقد أجرت (الحكاية) ٣ لقاءات مع ٣ رجال مختلفين قرروا تطبيق هذه الدراسة بكل دقة
اللقاء الأول مع أحد الأزواج من داخل عنبر الكسور :
* ألف سلامة عليك احكى لنا اللي حصل ده حصل ازاي ؟
- يأخذ فترة ليستجمع نفسه من شدة الألم ويقول : اااانا معرفش ايه اللي جابني هنا، انا آخر حاجة فاكرها ليلة دخلتي على مراتي الجديدة، مراتي الجديدة؟ اسمها ايه انا ناسي .. ناسي كل حاجة، انتوا مين؟ مراتي الأصلية فين؟ لاااا مش عايز اعرف هي فين، حسبي الله ونعم الوكيل فيها، لأ! مش حسبي الله ونعم الوكيل فيها.. أنا مش قادر اتكلم، أنا عايز المأذون.. هاتولي المأذون عشان اطلق التانية بسرعة ابوس ايديكوا، وهاتولي نمرة الجواهرجي اللي بتعامل معاه علشان اجيب للأولانية طقم هدية، ولا لأ.. هاتولي شبكة التانية اديها للأولانية. يتألم من جديد ويعود إلى صمته حتى يقطع الأنفاس.

- اللقاء الثاني مع أحد الأزواج من داخل المشرحة :
* عايزين  نعرف انت بتعمل ايه هنا؟
- جاي اشرح نفسي
* أفندم؟ تشرح نفسك ازاي يا أستاذ؟
- وانتوا مالكوا انتوا .. أنا جاي اشرح نفسي علشان اخلص من الدنيا بسرعة قبل ما مراتي تلاقيني، أصلها بتدور عليا بقالها ٣ شهر من ساعة ما اتنيلت اتجوزت عليها، حالفة يمين طلاق لا تشرحني وتعبيني في اكياس ساندويتشات فقلت اسبق انا بكرامتي ما كده كده هتشرح.. امشي بقى من قدامي عشان متوترنيش اكتر ما انا متوتر، محتاج اتشرح لوحدي شوية.
- طيب سؤال أخير حضرتك.. هيه هتشرح فيك إيه بالظبط ؟
- أمتنع عن الاجابة.

- اللقاء الثالث مع أحد الأزواج محشوراً داخل الثلاجة :
- - حضرتك بتعمل ايه في التلاجة ؟
- - مستخبي من مراتي
- - بس حضرتك كده خدت شكل علبة الجبنة وممكن يحصلك حاجة جوه من كتر القعدة، احنا وصل لنا أخبار انك مستخبي في التلاجة من أكتر من أسبوعين.
- (تدخل زوجته منهكة متعبة عطشانة بدون سابق إنذار بعد رحلة بحث عن الزوج دامت لأسبوعين ولم تدرك للحظة أن زوجها يختبئ في الثلاجة فى البيت لتجنبها، ولم نستطع رؤية ما حدث فيما بعد بسبب هروبنا بسرعة من هول الموقف)
وقد علمت "الحكاية" فيما بعد أن الزوجة أصدرت صوتا غريبا من فمها عجز كل المحللين عن تفسيره أدى الى انقطاع الكهرباء عن الحي بأكمله لمدة ٣ أيام.