"رسالة" ضابط ناشط لأهل "الفيسبوك "

قبل أيام نشر النقيب هشام صالح ضابط المرور بقسم الزمالك  على صفحتة الشخصية على موقع التواصل الاجتماعي "فيس بوك " رسالة تحت عنوان " رسالة لأهل الفيسبوك " .

تقول الرسالة كما نشرها الضابط : " انتشر على الفيسبوك موقف وانا واقف في الشغل مع بعض الناس وواحد كان بيشكرني أني ساعدته وكتب القصه في كلمتين وخلاص ، ثم تحول الموضوع بقدرة قادر لبطولة خارقه محصلتش قبل كده مثلا، بسبب أن الصفحات والناس عماله تشير في القصه وأنا قاعد والله العظيم في حالة ذهول ،الموضوع خد زخم غريب بدون داعي..ضابط واقف في شغله معملش أي حاجه غير أنه ابتسم في وش الناس ، المفروض أنه يعضهم مثلا ولا يتف في وشهم ، وأيه البطوله المستحيله في كده ياخوانا ، جرب ادخل أنت على أي ضابط واقف في اشاره واطلب مساعدته وشوف هيساعدك ولا لا."

واستطرد هشام صالح في رسالته قائلا "لو الفيسبوك ركز ربع ما ركز معايا في الضباط اللي بتروح كل يوم والعساكر والأفراد اللي في سيناء وفي كل حته في مصر واللي وصل عددهم ل750 شهيد ، و 12000 مصاب نصهم عنده عاهات مستديمه ، أقسم بالله ما حد هيتكلم على الشرطة ربع كلمه من كتر البطولات اللي تستاهل تتنشر بجد  ، يا أخوانا ده أنا لما اتوقفت واتحالت للاحتياط السنه اللي فاتت محدش عمل كده !! ، ده انا ظهرت الخمس سنين اللي فاتو في كل برامج الفضائيات ومحصلش كده !!.

وأبدى صالح اندهاشه من تعليقات المواطنين على الفيس بوك عن تعامل الضباط مع المسجلين خطر أثناء القبض عليهم ، وصور الأمر بطريقة ساخرة قائلا في رسالته :"احنا عملنا بالظبط كده زي الناس اللي صورت ضابط مثلا وهو بيزق مسجل خطر واتعمل عليها حدوته...والمفروض مثلا يقوله الكشري بتاع سعادتك حمصه ايه ؟، أو يجيبله نسكافيه ، ودليل أننا في حاجه غلط ولازم نراجع حساباتنا ومش الفيسبوك اللي هيمشينا ياخوانا، ولا يقولنا نعمل ايه...

واختتم صالح رسالته بالاعتذار للصحفيين لعدم الظهور إعلاميا مبررا ذلك بعدم وجود مبرر للظهور إعلاميا ، ومهاجما في الوقت نفسه الإعلاميين قائلا "حضراتكم بتشتغلوا بمبدأ عندنا ايه النهارده وايه اللي ماشي في البلد اليومين دول ... وطالما هنفضل كده يبقى ازاي عايزين اعلام بجد ..!

كان ناشط على موقع التواصل الاجتماعي "فيس بوك " مهندس عمرو الزيني قد نشر رسالة عبر فيها عن  شكره للنقيب هشام صالح على تصرفه اللائق معه أثناء سيره بسيارته باتجاه كوبري قصر النيل وفتح الطريق له رغم التكدس المرورى لمساعدته في محاولة إنقاذ ابن شقيقته وإيصاله إلى أقرب مستشفى وبمجرد وصوله وجد توصية من الضابط للأطباء لمساعدة الزيني .

 

التعليقات