فى بلاتوه قناة تليفزيونية وأشكال كاميرات وتصوير يجلس المعلم صبحى أمامه الشيشة يشد منها فى استمتاع وأمامه يافطة "المعلم صبحى صاحب القناة" وبجواره المخرجة والصبى "حتة"
المخرجة :يامعلم قوم بقى عشان دقيقة واحدة ونبقى هوا
المعلم: هتبقوا هوا ازاى يعنى؟؟ هتتبخروا
المخرجة: يامعلم البرنامج هيبدأ ابوس إيدك
المعلم: على ما الدقيقة دى تفوت أكون خلصت التعميرة.. ولو سمعت صوت تانى وانا باعمر الطاسة هاقفل الكناة (القناة) دى واقلبها كوافير حريمى.. انتوا شغالين عندى
تتركه المخرجة وتضع غضبها فى صوتها وهى تصرخ:
الأستاذ عادل المذيع يتفضل
صوت من الخارج: الأستاذ عادل المذيع مجاش
ينتفض المعلم ويقول: مجاش؟ مجاش ليه إن شاء الله؟ ده واخد يوميته من امبارح.. واد يا حتة
يدخل حتة ومعه دفتر كبير حضور وانصراف :
نعمين يامعلم
المعلم: اخصم يومية عادل ده وتمِّم على بقية الأنفار
يخرج حتة وتصرخ المخرجة:
طب وهنعمل إيه دلوقتى.. البرنامج هيبدأ
المعلم: ولا تعكّرى مزاجك.. واد ياحتة
يعود حتة فى زهق:
نعمين يامعلمى
المعلم: روح للكناة اللى جنبنا بتاعة المعلم عوض وقول له المعلم بيمسى عليك وبيقول لك معلش احنا مزنوقين فى مذيع.. وما بين الخيرين حساب
حتة: حمامة يامعلمى