وجهت الإعلامية ياسمين عز، بعض النصائح للزوجات للتعامل مع أزواجهن، وخاصة خلال الظروف الاقتصادية الحالية.
وقالت «عز» في تعليق خلال برنامجها «كلام الناس»، الذي يعرض عبر قناة «إم بي سي مصر»: «رفقًا بالرجال خصوصًا في الأوقات الصعبة اللي زي دي، مش هتبقي إنتي والزمن والدنيا عليه، حسسيه إنك معاه على المرة قبل الحلوة، وبلاش تحمليه بمسؤوليات فوق طاقته».

وأضافت: «بلاش تبكتيه بالكلام، وتحسسيه إنه أقل من الناس اللي حوالكي، هو لو معاه مش هيبخل عليكي، هو مجبر، كمان مهم جدا عدم التقليل من زوجك أمام أولادك أو أمام أهلك أو أهله».

وتابعت «عز»: «لما تلاقي جوزك راجع من الشغل عشان يشرب شاي وينزل على شغلانته التانية اللي بيحسن بيها دخلكم، المفروض تبوسي دماغه، بلاش تقعدي تشكي فيه وتقولي له وأنا إيه ضمني إنك نازل شغل، ما يمكن إنت شايف لك شوفه تانية».

وأكملت: «في وقتين متطلبيش من الراجل فلوس، أول ما يصحى من النوم، وقبل ما ينام بالليل، أول ما يصحى متتكلميش كتير سيبه ياخد الشاي أو القهوة بتاعته واطلبي منه خلال اليوم، وقبل ما ينام بيكون جاي هموم على قلبه عايز يتعشى وينام، بلاش تقولي له لستة الطلبات عشان هينام مهموم ممكن يجراله حاجة منك، اطلب الحاجة على جرعات خلال اليوم، بلاش الوقتين دول».