تحدثت الفنانة إلهام شاهين عن تجاربها في الإنتاج السينمائي موضحة أنها خسرت أموالها بسبب عدم قدرتها على التسويق.
وقالت إلهام شاهين في لقاء مع برنامج "مساء dmc" على هامش حفل افتتاح الدورة 44 من مهرجان القاهرة السينمائي الدولي: ممكن أخوض تجربة الإنتاج تاني أنا عنيدة وهي بتبقى زي لعبة القمار، تخسري في فيلم فتقولي هعمل فيلم تاني يمكن أعوض وأخسر وأعمل فيلم تالت، وأنا بحب السينما.

وأوضحت سبب عدم تمكنها من الكسب من الإنتاج قائلة: مبعرفش أسوق بعرف أنتج لكن معنديش علاقات في التسويق وإزاي أبيع الفيلم، دي عايزة دراسه وأنا ومعرفتش أعمل ده وراحت فلوسي ومرجعليش حاجة في الإنتاج.
وكشفت إلهام شاهين خلال اللقاء إنها لن تتواجد في رمضان 2023، بعدما كان من المفترض أن تشارك في مسلسل "حضرة العمدة" مع روبي.
وقالت إلهام شاهين: مش هكون موجودة على الشاشة في رمضان اللي جاي للأسف لأني ببقى نفسي يكون معايا كل الحلقات مبعرفش أصور وأنا معايا 6 أو 7 حلقات من 30 حلقة أبقى فاهمة دوري وأبقى فاهمة أنا حجمي إيه في العمل من كل اللي حواليا، أنا متعبة في شغلي ودا بيتعب المنتجين مش قادرة أجاري السوق، ويارب أقدر أحضر من دلوقتي لرمضان 204.
وعن السينما قالت: في فيلم بس الموضوع متوقف حاليا هو فيلم "بنات صابرة" موضوعه شائك ومهم عن زواج القاصرات وختان الإناث.

وخلال اللقاء عبرت إلهام شاهين عن سعادتها بالمهرجان وعودة الفنان حسين فهمي لرئاسته متذكرة الدورات السابقة التي ترأسها وحضر فيها نجوم عالمين مع النجم المصري العالمي عمر الشريف.
يذكر أن إلهام شاهين شاركت في رمضان 2022 بمسلسل "بطلوع الروح" الذي عُرض في النصف الثاني من شهر رمضان عبر قناة MBC مصر ومنصة شاهد vip.