قال الدكتور محمد عبد الله، المتحدث الرسمي باسم نقابة المهن الموسيقية، إن المطرب توو ليت حضر للنقابة وكشف عن هويته وحصل على تصريح سنوي وانضم لشعبة الغناء.

أوضح "عبد الله": "المطرب توو ليت هو شاب وحاول يتميز وسط خضم المطربين والمؤديين والأداء الصوتي، ففكر في فكرة إن هو يطلع مقنع أو يلبس قناع علشان يعمل نوع من أنواع التشويق للجمهور والناس تسأل مين ده ويلفت الانتباه".

تابع: "وبالفعل نجح بأن هو عن طريق الأسلوب اللي اختاره ده والقناع اللي حطه قدر أنه يجتذب قطاع كبير جدا من الناس وبقت الناس شغوفة بيه وعايزة تعرف مين ده وبدأت تردد أغانيه".

استكمل: "في الآونة الأخيرة بدأ يتطلب توو ليت في حفلات، فمش هيقدر يعمل أي حفلة غير لما يروح للجهة المختصة بإصدار التراخيص للحفلات، فتوجه للنقابة العامة للمهن الموسيقية هو ومدير أعماله والشركة اللي هتعمله الحفلة علشان المفروض فيه حفلة بكرة في زد بارك".

أردف: "وهو قعد مع اللجنة المختصة ومع لجنة العمل، واللجنة اختبرته وكشف القناع من على وشه لأن النقابة عمرها ما هتدي تصريح لحد يكون مجهول الهوية بالنسبة لهم فكان لازم يكشف عن شخصيته الحقيقية".

اختتم: "هو شاب كويس جدا ومتعلم ومهذب وخريج جامعة ومثقف وشاب جميل، واقتنعنا بصوته وخد شعبة الغناء وحصل على تصريح سنوي يجدد كل سنة وشعبته غناء.. والأسلوب اللي هو اختاره ده عرف يتميز بيه ونسيب له بقى هو الطريقة اللي يكشف بيها عن هويته للناس وجمهوره".