مواصفات العريس الكامل من مجاميعه!

تجلس منى بين والدها ووالدتها على كنبة الصالون

 

الأم: يابنتى عشان خطرى اخلصى بقى ووافقى على العريس اللى جاى دلوقتى
منى: ياماما مستحيل اتجوز بالطريقة دى
الأم: يابنتى مش مشكلة طريقة اللعب.. المهم ان الفريق بيكسب وخلاص
الأب: وبعدين يابنتى ماحنا جبنالك عريس من الصعيد وانت رفضتى
منى: الصعيد؟ لاااا.. عشان يطلعوا عليه نكت فى العمارة وللا يبقى عليه تار واموت بسببه
الأم: طب والعريس اللى كان من الأرياف زى الفل؟
منى: عشان يملا البيت مشّ ورقاق ويزرع لى البلكونة عشان نوفَّر ونربِّى فراخ وبط
الأب: طب وعريس القاهرة ده كان لقطة
منى: لقطة بالنسبة لكم.. انما يدخل من باب الشقة يشخط وينطر من الزحمة والتلوث وانا المفروض استحمله.. وانا إيه اللى يجبرنى؟
الأم: يابنتى حيرتينى أمال عايزة العريس ازاى؟
منى: شوفى ياماما لازم العريس اللى أقبله يكون شبه بابا كده ف كل حاجة
يتمدد الأب على الكنبة فى فخر
الأب: أصيلة يابنتى
الأم: جاتك خيبة.. مالقيتيش غير باباك.. ياختى اتجوزى درفيل أحسن
منى: ياماما مش مهم الشكل.. أهم حاجة انه يقوم بواجباته معايا بعد الجواز
تغمز فوزية للأب فى غموض
الأم: ماهى دى الخيبة.. واجباته بعد الجواز دى
ينكمش الأب فى كسوف
الأب
ما خلاص بقى يافوزية
يرن جرس الباب
الأم: أهو العريس وصل عشان خطرى اقبليه واخلصى.. قوم شوف الراجل
يفتح الأب ويستقبل العريس ويدفعه للداخل
الأب: أهلا أهلا.. اتفضل يابنى
العريس: أهلا ياعمو.. أهلا ياطنط.. أهلا يا آنسة منى
الأم: هنسيبكم شوية عشان تكلموا بعض من غير كسوف
يجلسان سويا وتحدثه منى فى آلية وصرامة
منى: ازيك.. بتعرف تغسل الصحون؟
العريس: الحمد لله.. شفت بابا كتير وهوه بيغسلها واتعلمت
منى: بالنسبة للكنس والمسح؟
العريس: لا دى سهلة.. متعلمهم من زمان من بابا برضه
منى: وماما بتبقى فين فى كل ده؟
العريس: ماما بتبقى بتشاور لبابا على الحاجات اللى يعملها
منى: إشراف فنى يعنى.. تمام
منى: وبالنسبة للرضاعة؟
يفاجأ العريس بالسؤال فينظر إلى صدره بغرابة ثم يستسلم
العريس: مش عارف.. بس هاتعلم
منى: ماتعرفش بكرة يبقى إيه؟
العريس: التلات إن شاء الله
منى: انت متأكد.. لو ماطلعش التلات هازعل قوى
العريس: لا ماتقلقيش أنا اعرف الناس اللى ماسكين الأسبوع.. وقايلين لى ان بكرة تلات.. و 24 ساعة كمان مش زى كل يوم.
منى: كويس.. يعنى بتمسح وتكنس وتغسل الأطباق وترضع.. وكمان تنفع نتيجة وساعة.. مش بطال
تدخل الأم والأب
الأم: إيه الاخبار ياولاد؟
منى: لا تمام ياماما.. الحمد لله انا ارتحت قوى.. طلع زى بابا بالظبط
تضرب الأم على صدرها بفزع
الأم: زى بابا بالظبط؟
منى: بالظبط يا ماما
تشد الأم العريس وتطرده للخارج
الأم: قوم يابنى مع السلامة.. عندنا واحد كفاية.. ياميلة بختك يابنتى.. اطلع برة!
 
التعليقات